Bruxeles pide al Estáu un retrasu nuevu na edá de xubilación

|

La Comisión Europea afaló a Rajoy a retrasar otra vuelta la edá de xubilación, que pasó de los 65 a los 67 años nel 2011. La so intención ye frenar el gastu en pensiones y garantizar la sostenibilidá de les finances públiques a plazu llargu.

Nel so informe añal sobre sostenibilidá fiscal na Xunión Europea (XE), Bruxeles señala que la reforma de les pensiones aprobada nel 2011, que retrasó en dos años la edá de xubilación, tendió "un impautu positivu visible". Sicasí, alerta de que'l gastu en pensiones del Estáu español va siguir penriba de la media comunitaria hasta'l 2060, hasta teniendo en cuenta los efeutos d'esta reforma. "De resultes, obsérvense riesgos a la sostenibilidá del sistema de pensiones n'España a plazu mediu y llargu", resalta l'Executivu comunitariu.

"España tendría que garantizar que'l factor de sostenibilidá del sistema de pensiones incluya un vínculu claru de la edá de xubilación con cambios na esperanza de vida, de forma que'l gastu en pensiones pueda frenase al llargu plazu", señala l'informe. Ente'l 2010 y el 2060, ésti va aumentar nel Estáu en 3,6 puntos del PIB, penriba de la media comunitaria, prevista en 1,4 puntos. "Precísase contener más l'aumentu del gastu rellacionáu col avieyamientu de la población pa contribuyir a la sostenibilidá de les finances públiques a llargu plazu”, añade. A plazu mediu y llargu, si nun cambien les polítiques vixentes, la deuda pública va siguir aumentando dende'l 97,1 por cientu del PIB nel 2014 hasta'l 114,4 por cientu nel 2020, y el 129,4 por cientu nel 2030.

L’Estáu “paez enfrentase a un riesgu d'estrés presupuestariu al plazu curtiu, proveniente de forma principal de la parte fiscal de la economía, pero en parte tamién de la parte macrofinanciera y de competitividá", asegura l'informe. "La aplicación plena del axuste previstu contribuiría yá muncho a baxar el riesgu de "estrés presupuestariu" a cortu plazu, apunta l'Executivu comunitariu.

 

Contador Estadistiques