Brañas d'antañu, meyor cantar n'Asturianu nel 2.003 sigún los nuesos llectores

"Brañas d'Antañu" de "Gatos del fornu" ye'l meyor cantar n'asturianu de 2003 a xuiciu de los llectores d'Asturies.com.

Esti concursu "Premia'l meyor cantar n'asturianu" organizáu por esti diariu entamó'l mes pasáu con una primer fase na que recibimos cientos de e-mails con votaciones. Nesa primer fase pudimos ver que cantares d'angüaño yeren los que contaben col favor del públicu, "La Pongueta" de Felpeyu, "La Canción de les Piragües" de Vicente Diaz, o "El Cantar del Home solu" d'Anabel Santiago son dellos exemplos de cantares que ricibieron abondo sofitu. Pero nun pudieron llegar a entrar nel tríu de cantares más votaos que foi'l formáu por "Al son de la lluna" d'Anabel Santiago, "Fayeos de Mayo" de Felpeyu y "Brañas d'Antañu" de Gatos del Fornu, per esti orde de mesno a más votos recibios.

Dempués llego'l Conceyu Abiertu nel qu'a lo llargo d'esti mes los nuesos llectores teníen que decidir cual de los tres cantares yera'l ganador. Namás echar andar el Conceyu Abiertu yá quedó claro cuales diben ser les posiciones finales, Gatos del Fornu entamó rapidamente a sumar abondos votos, y anque "Los fayeos de Mayo" de Felpeyu tamién recibía muncho sofitu nun foi quien a alcanzar a "Las Brañas d'Antañu". En tercer posición siempre tuvo Anabel Santiago que quedó descolgada de la "pelea" pol primer puestu.

"Brañas d'Antañu" ye un tema de l'únicu discu d'esti grupu uvieín que lleva'l nome del propiu grupu. Ta compuestu por Luis Javier Alonso y tien igües d'Alberto Ablanedo y Igor Medio, y la lletra del cantar ye una parte d'un poema d'Eva González. Con esti cantar los Gatos como ellos mesmo dicen quieren "ser un homenaxe particular a tolos que vivieron nesti país, Astutries, enantes que nós".

Dende Asturies.com felicitar a los "Gatos del Fornu", asina como a los ganadores de los llotes de regalos que sorteabamos, David Xosé Suárez de la Calle, del conceyu de Corvera, y Lorena Menéndez Rodríguez, del Conceyu de Mieres. Tamién dar les gracies a los patrocinaores d'esti concursu, les cases discogrñafiques "L'Aguañaz" y "Fonoastur".