Braña La Pornacal: de 37 a 20 cabañes en pie, “y en qué estáu”

|
Cabaña en La Pornacal desaniciada

“Ye dalgo único n’Europa y el so abandonu una perda importantísima non sólo patrimonial, tamién simbólica, porque ye parte de la nuesa identidá como pueblu”, esplica Ástur Paredes, de la Fundación Belenos, que denuncia la situación na que ta anguaño La Pornacal. Nel 1983 esti etnógrafu contabilizó 37 cabañes nesta braña del conceyu de Somiedu, de les que queden agora 20 en pie, a les qu'hai que sumar otres 2 con igües nos teitos que les desnaturalicen dafechu.

“Y en qué estáu”, añade Paredes, que recién asoleyó una semeya d’esi añu na qu’apaez el barriu de La Braña’l Medio y una parte d’El Cabu onde se ven 19 cabanones de teitu de los que 9 yá tán agora fundíos y otros 2, parcialmente. “La pérdiga de patrimoniu ye brutal, non sólo en cuantu a númberu de cabañes; tamién otros elementos constructivos: los zarros, les muries, les portielles… ¡Asturies muerre!”, rellata.

Porque esta situación –que tamién se da con otres construcciones tradicionales, como horros o paneres– repítese nos otros barrios de La Pornacal –que vivió una rehabilitación integral hai 25 años dirixida por Adolfo García Martínez a cargu del proyeutu LIFE, con fondos europeos–, como La Braña’l Ríu y La Prida, o n’otros puntos de Somiedu, como la braña Mumián. “Hai miles de factores que trabayen toos pa lo mesmo: el desaniciu”, diz Paredes, qu’apunta sobre manera a les cuestiones demográfiques, “con pueblos ensin xente y les persones que queden, mayores; menos xente dedicada a la ganadería, pérdiga de función…; y que’l teitu lleva un trabayu y ha renovase tolos años una parte… El propiu mediu yá nun tien capacidá pa perdurar”.

Por esti motivu considera que les soluciones tienen que venir de fuera, “ayuda esterna que la impulse, renueve o la protexa”, apuntando al Parque Natural de Somiedu, al Ayuntamiento y al Gobiernu. “Pero tamién ayuda de ti y de min, de la sociedá civil; tien qu’haber un compromisu de la sociedá asturiana. Un exemplu: los campos de trabayu xuveniles funcionen per toa Europa, ¿por qué non ún dedicáu a los teitos?”, entruga.

Parte de la nuesa identidá como pueblu

“Somiedu ye una zona deprimida, con pocos recursos demográficos, y la ganadería, los teitos y la naturaleza ye la so ENSIDESA. L’elementu distintivu de Somiedu ye’l mundu etnográficu de los teitos”, afirma al tiempu que recuerda la importancia cada vez mayor del turismu nel PIB d’Asturies. “Ye dalgo único n’Europa y el so abandonu una perda importantísima non sólo patrimonial, tamién simbólica, porque ye parte de la nuesa identidá como pueblu”, añade.

De los 37 teitos que contabilizó nel 1983 agora queden en pie “20, y en qué estáu”, a los que suma dos con igües recientes al estilu de les barraques valencianes. Un SOS mayúsculu col que la Fundación Belenos quier salvar lo que queda d’esta auténtica maraviya del nuesu patrimoniu.

Na parte superior, imaxe de como taba l'añu pasáu una cabaña de teitu que fundió nos meses pasaos. Na inferior, fotografía del 1983 nel que se marquen con una cruz les cabañes desanicies y, con una raya, les desnaturalizaes o a piques de cayer.
 

Semeyes obra d'Ástur Paredes.

Contador Estadistiques