Braga ve "cualificáu" a Areces pal Ministeriu de Trabayu

El secretariu xeneral d'UXT Asturies, Justo Rodríguez Braga, manifestó esti martes que Vicente Álvarez Areces "tien cualificación pa tar nel Ministeriu de Trabayu o n'otru".

"Nel momentu en que tuviera disponible creo que sería una persona perafayadiza pa cualquier tipu de responsabilidá penriba de la que tien nestos momentos y amás creo que dalgunos temes resolveríalos de mou eficaz", dixo Braga.
  
Rodríguez Braga manifestábase d'esa manera al ser preguntáu polos periodistes pola posibilidá de que'l presidente del Principáu, Vicente Álvarez Areces, ocupe la cartera de Trabayu n’ámbitu estatal.
  
El dirixente sindical recordó qu'Areces desenvolvió un trabayu bien importante nel Conceyu de Xixón y na presidencia del Principáu, y considerólo un “cabezaleru de nacimientu que siente los problemes de la sociedá bien fondamente".