Borrell avisa de la importancia de Kioto p'Asturies

Ayeri tuvo n'Uviéu'l cabeza de llista pol PSOE nes próximes elecciones europees, Josep Borrell. El PSOE, al que les encuestes dan por ganador nestes elecciones, celebró con elli nel Auditoriu Príncipe Felipe l'actu principal de la so campaña n'Asturies.

Borrell, que foi ministru nos gobiernos de Felipe González y salió secretariu xeneral electu del PSOE tres d'unes famoses primaries nes que valtó al candidatu "oficial" Joaquín Almunia, defendió ayeri n'Uviéu la creación d'un salariu mínimu européu que torgue la competencia ente estaos miembros de la UE con costes llaborales distintos y l'efectu de deslocalización d'empreses qu'ello pue llevar arreyao. Borrell recordó que los países del Este tienen salarios cinco veces más baxos y que tan entrando nuna dinámica de baxada d'impuestos p'atraer más inversiones. Por ello'l candidatu socialista entiende que ye preciso facer una Europa na que concueyen les midíes fiscales y sociales de tolos estaos miembros.

Borrell, que dixo qu'Europa tien de llevá-y "la contraria" a los Estaos Uníos, centró parte de la so intervención n'atacar les posiciones del PP, criticando con sorna la idea de defender l'enxertamientu del cristianismu na futura constitución europea contra la Europa llaica qu'elli defende.

El mitín del candidatu socialista dio sobre too, un puntu d'atención mui claru p'Asturies: el nuestru país depende dafechu económicamente d'industries que tan afectaes en pol Protocolu de Kioto, la carta que regula'l derechu del los estaos a emitir gases contaminantes. Borrell dio anuncia de qu'Europa "tien de ser una potencia mediuambiental" y esa perspectiva ye p'Asturies incluso más importante que la reconversión nel sector de la minería o la construcción naval, que pal candidatu socialista son cuestiones secundaries énte lo otro, acusando tamién al PP de facer una mala política mediuambiental y negociar mal el protocolu de Kioto