Bona dimposición ente l'ALLA y la Xunta Xeneral del Principáu

Nel día de güei, una representación de l'Academia de la Llingua Asturiana de la que formaben parte la so Presidenta, Ana María Cano González y el Secretariu de la institución Roberto González-Quevedo, caltuvo una entrevista na sé de la Xunta Xeneral del Principáu con Mª Jesús Álvarez González, Presidenta de la institución

Según informa l'Academia de la llingua, esta xunta inxértase dientro de los aconceyamientos institucionales que caltién l'Academia coles otres instituciones del Principáu y de les que, ensin dulda, una de les más emblemátiques ye la Xunta Xeneral.

L'ALLA fízo-y entrega a la Presidenta de la Xunta Xeneral de los dos últimos trabayos asoleyaos pola Academia, el mapa Principáu d'Asturies y los sos conceyos onde se recueyen les denomaciones asturianes de los 78 conceyos y les sos cabeceres, y el númberu 88 de Lletres Asturianes, que ta acabante espublizase.

D'otra parte, la entrevista ente los representantes académicos y la presidenta del parlamentu asturianu centróse nes posibles llinies d'actuación conxunta de les dos instituciones, sobremanera no que se refier a temes como la normalización de la llingua asturiana dientro de la Xunta Xeneral, la posibilidá d'entamar conxuntamente publicaciones o la creación de cursos de llingua asturiana específicos pal personal de la Xunta, ente otros

Según la institución académica, la xunta ente los representantes de les dos instituciones desendolcóse, como davezu, con una gran cordialidá y un bon entendimientu, y tanto la Presidenta de la Xunta como la de l'Academia amosaron el so enfotu por siguir calteniendo esti tipu de contautos periódicamente.