Bomberos d’Asturies protesten pol despidu de 20 efectivos

Dellos trabayadores de la entidá pública Bomberos d’Asturies protestaron esti martes nel conceyu de Casu contra’l despidu d’una ventena de compañeros que, según informaron, dirán a la cai’l próximu día 31 d’avientu.

Con pancartes nes que se podía lleer ‘Cola seguridá nun se xuega. Non a los despidos en Bomberos d’Asturies’, estos efectivos llevaron la so reivindicación a les puertes del nuevu parque de bomberos de Coballes, en Casu, que s’inauguró oficialmente esta mañana pola conseyera de Presidencia, María José Ramos.

Los efectivos criticaron que’l so despidu va facese efectivu a finales de añu cuando remate’l procesu de selección de 78 trabayadores y aseguraron qu’esta decisión del Principáu "incumple" el conveniu colectivu robláu "pol mesmu Gobiernu qu’hai agora". Amás, indicaron que munchos de los futuros despedíos tienen muncha antigüedá y cualificación, daqué que treslladaron a la mesma conseyería.

Apoyu del Bloque
El Bloque por Asturies yá amosó’l so apoyu a los bomberos y criticó la decisión del Principáu. Nuna nota de prensa, el BA recuerda la cualificación y esperiencia de los trabayadores que quieren despedir y sorraya qu’estos “ganaron una sentencia con fecha de 10 d’avientu de 2004 que reconocía’l so derechu a ocupar les places”.

“Anguaño, la falta  de personal provoca que la mayoría de los parques de bomberos tean zarraos pela nueche, nun pudiendo garantizase un serviciu inferior a los 30 minutos nuna emerxencia”, señaló’l Bloque, opinando tamién qu’estos despidos “afecten de mou granible a la calidá de los servicios públicos y de forma gravísima a la seguridá ciudadana”.

Nesti sen, el Bloque por Asturies esixó al Gobiernu del Principáu “el caltenimientu de los puestu de trabayu, l’aumentu de la plantiya cola incorporación de nuevos efectivos tres les oposiciones, la calidá d’un serviciu fundamental pa la seguridá ciudadana y el fin de los retayos de puestos de trabayu que ponen en peligro servicios públicu de calidá básicos y fundamentales como la sanidá, la educación y la seguridá pública”.