Boides Vuelve 11 años depués al camín de Compostela

En 1993, el desapaecíu grupu Boides grabó con Fonoastur un discu en que se fai un estoyu de temes musicales de la tradición popular recoyíos a lo llargo del camín de Santiago al so pasu per Asturies. Agora, con motivu de la celebración del añu Xacobéu, el discu vuelve nuna edición remasterizada qu'esta mañana presentaron na Conseyería de Cultura'l Director Xeneral de Promoción Cultural Carlos Madera, el diseñador gráficu del CD Astur Paredes, el productor Lisardo Lombardúia y Xuan Nel Expósito, ún de los miembros de la desapaecida formación folk.

Expósito, anguaño una de les cabeces del grupu Felpeyu, declaró que en1993 esti discu supunxo un cambéu mui importante dientro del canon y estilu de música folk que se facía daquella n'Asturies, un cambéu que d'aquella nun s'entendió y que dexó a esti discu apigazando hasta agora, que va ser cuando'l públicu lu recupere. L'editor discográficu Lisardo Lombardía afaló a esta recuperación por parte del púbicu emponderando la meyora de calidá sonora del discu gracies al llabor de remasterización, que fai que Boides suene agora como nun se sintió nunca

El discu ígüenlu 16 temes, los más d'ellos tradicionales , faciendo un recorríu xeográficu-musical pelos dos caminos de pelegrinación asturianos, primero l'interior que, separtándose del "camín francés" en Llión, empobinaba'l so andar pel Puertu payares pasando Arbás pa llegar hasta San Salvador d'Uviéu, yendo darréu pel occidente, y tamién el camín de la costa qu'entraba pel oriente pasando per Llanes y Siero hasta Uviéu, garrando otra vuelta la costa nun segundu tramu occidental.

Musicalmente, en Boides amás del curdionista Xuan Nel Expósito, taben tamién el gaiteru Hevia, Daniel Lombás a les percusiones, el vigulineru Javier Lombás y Joaquín menéndez colos teclaos. Los miembros del grupu entovía se ven dacuando, y ún de los deseos que se formularon tres de la presentación foi'l d'axuntar otra vuelta a Boides enriba l'escenariu pa un conciertu especial. La idega ta ehí, y pue que se faiga realidá enantes de qu'acabe l'añu.