Bloque-UNA pide la retirada del borrador de la ordenanza de convivencia ciudadana de Xixón

“Nun pue almitise nenguna negociación onde'l puntu de partida sía'l retayu de derechos y llibertaes básiques". Bloque por Asturies-UNA amuesa’l so descontentu pol borrador de la ordenza de convivencia ciudadana de Xixón y pide la so retirada.

Esta propuesta d’ordenanza, que recueye multes d’hasta 750 euros por beber alcohol na cai nun procedente d’un establecimientu hosteleru, la mendicidá, tener rellaciones sexuales na vía pública o la prostitución, ente otres munches coses, ta xenerando un debate importante en Xixón. Dende munchos sectores ven esta normativa como un secuestru del espaciu públicu y una imposición d’una moral conservadora a la ciudadanía de Xixón, y apuesten pola educación enantes de pola prohibición.

Dende’l Bloque por Asturies-Unidá Nacionalista Asturiana (UNA) critiquen lo que consideren una estratexa de la derecha municipal, como ye “partir d'un borrador qu'atenta directamente escontra los nuestros derechos, xenerando un alderique falsu que permita llograr un testu aparentemente axustáu que va siguir mancando les nuestres llibertaes básiques”. Na so opinión, el fenómenu del botellón “ye lo que menos importa nesta ordenanza, en tantu qu'esti fenómenu nun ocupa nin un foliu de los venti que componen el borrador de la ordenanza”. Según esplica Daniel Fernández, voceru de la coalición en Xixón, “el restu de la normativa dedícase direutamente a facer de la cai un cotu pa les empreses privaes, escluyendo a la ciudadanía, reduciendo los sos derechos de participación, manifestación y d'espresión”, añadiendo “un tratu denigrante a los coleutivos más desprotexíos como ye la xente ensin casa, ensin recursos, y les prostitutes”.

Por esti motivu, los nacionalistes refuguen un procesu de negociación d'un borrador que “esclúi a la mayor parte de la ciudadanía de Xixón y especialmente a los seutores que más direutamente afeutaos veremos por esta norma, como los mozos, los escluyíos sociales, les prostitutes y les organizaciones polítiques y sociales ensin recursos económicos públicos, pa los que, polo visto, pa Foro y PP nun tenemos voz propia”. D’igual forma, califiquen d’intolerables “los términos del borrador de la ordenanza, porque nos negamos a considerar almisible como puntu de partida de nada, lo que nengún demócrata pue almitir: retayar derechos fundamentales”.