Bloque-UNA esixe al PSOE que cumpla los sos compromisos y pieslle les centrales nucleares

La coalición Bloque por Asturies-UNA ratificó esti miércoles la so postura contraria a la enerxía nuclear. La formación nacionalista esixó al PSOE que cumpla los sos compromisos eleutorales y pieslle les centrales esistentes nel Estáu.
 
Rafael Palacios, candidatu del Bloque por Asturies-Unidá Nacionalista Asturiana a les eleiciones nacionales de mayu, mostró la solidaridá de la coalición col pueblu xaponés tres el terremotu y tsunami del vienres pasáu que provocó una alarma nuclear polos daños creaos en delles centrales del país asiáticu. “Los acontecimientos gravísimos que tan asocediendo en Xapón demuestren la incapacidá de reaición por parte de les centrales nucleares nel casu d’accidente y la indefensión na que s’alcuentra’l planeta ante una catástrofe d’estes dimensiones”, señala.
 
El cabezaleru de la formación nacionalista tamién denuncia que “el desastre nuclear desvió recursos inxentes de la ayuda humanitaria imprescindible, dexando n’abandonu a más de cien mil personas”. “Lo que ta pasando en Xapón representa lo que la industria nuclear afirmaba ser prácticamente imposible y que, por contra, ya yé realidá cruel”, añade. Por ello, esixe al presidente del Gobiernu estatal que reaccione ante la peligrosidá de la enerxía nuclear, que pa Palacios “ye sucia y dañina”, y cumpla col so compromisu eleutoral de llevar alantre un plan de pieslle de les centrales del Estáu.
 
Pa ser más concretu, Palacios reclamó’l fin de l’actividá de la centrar nuclear burgalesa de Garoña, “que tien un reactor nuclear de la mesma teunoloxía y época que los reactores que tán en riesgu grave en Fukushima”.