Bloque-UNA del Nalón refuga la propuesta de FAC de recuperar el trazáu orixinal de Lada-Velilla

El Bloque-UNA del Nalón amosó’l so refugu a la propuesta de FAC de recuperar el trazáu orixinal de la llinia d’alta tensión Lada-Velilla. La coalición recuerda qu’hai resoluciones xudiciales que paralicen el pasu d’esta llinia por Tarna.
 
El debate abiertu nos medios de comunicación sobre’l futuru d’esta llinia d’alta tensión que dende 1983 busca xunir Lada con Velilla del Río Carrión, en Palencia, llevó a Bloque por Asturies-Unidá Nacionalista Asturiana (UNA) del Nalón a asoleyar un comunicáu nel que la coalición refuga la propuesta de Foro Asturias Ciudadano (FAC), incluyida nel so programa eleutoral, de recuperar el trazáu orixinal de la llinia d’alta tensión que percorría los conceyos de Llangréu, Samartín del Rei Aurelio, Llaviana y Casu pa entrar en Lleón por Tarna. “De confirmase esta noticia, taríamos ante una actitú antidemocrática por parte del partíu que sustenta al Gobierno asturiano, qu’insta a una empresa –Red Eléctrica Española (REE)– a desobedecer les resoluciones xudiciales dictaes nel so momentu –sentencia del Tribunal Superior de Xusticia de Madrid de fecha 29 d’ochobre del 2003 na que s’anulaba la Resolución del 24 de mayu del 1999 de la Direición Xeneral de la Enerxía qu’aprobó el proyeutu d’execución de la llinia llétrica–, asina como la Resolución de la Xunión Europea qu’instaba a REE a la paralización d’esi trazáu y al esmantelamientu de les torretes yá instalaes”, afirmen los nacionalistes.
 
Al respeuto, la coalición recuerda que’l “motivu principal, tanto del Tribunal como de la Xunión Europea pa refugar esti trazáu yera l’impactu negativu sobre zones de valor medioambiental altísimu, tanto pola importancia de la so flora y fauna como pol so valor paisaxísticu –Espaciu Protexíu de les Cuenques Mineres, Parque Natural de Redes, Parque Natural de Fuentes Carrionas y el Parque de Picos de Europa–”. Por ello, Bloque-UNA del Nalón considera que FAC s’enfrenta al Estáu de Derechu, nun respeta las decisiones xudiciales nin tampoco les polítiques d’aquellos órganos con competencies na materia “cuando entiende que nun s’axusten a los sos intereses”. Los argumentos del partíu de Francisco Álvarez-Cascos p’apostar pol trazáu orixinal de la llinia ye que la parte asturiana yá ta construida, anque non activa.
 
Por último, los nacionalistes refuguen el trazáu actual de Lada-Velilla, previsto pel conceyu d’Ayer, y reclamen la retirada del proyeutu d’esta llinia d’alta tensión por “ineficiente y porque, en realidá, supón convertir a Asturies en colonia suministradora d’enerxía del restu del Estáu español, sufriendo los efeutos perversos, medioambientales, sociales y económicos que trae consigo esta situación”.