Bloque-UNA de Ḷḷena busca crear emplegu tresformando’l conceyu n’ecosostenible

L’apuesta del Bloque por Asturies-Unidá Nacionalista Asturiana (UNA) de Ḷḷena pa crear puestos de trabayu nel conceyu pasa por convertilu n’ecosostenible. Xosé Agripino Pérez, candidatu de la coalición a l’alcaldía, considera que l’emplegu verde nun ye una utopía: “Apostar pol fomentu de les enerxíes alternatives, facer una xestión correuta de residuos, fomentar la agricultura ecolóxica y potenciar el turismu sostenible, va ayudar a la xeneración de emplegu estable y de calidá nel conceyu”, asegura.

Pérez Acebal considera que’l conceyu de Ḷḷena tien un potencial grande pola so situación estratéxica, bien comunicáu cola Meseta, como pol so potencial natural, y por ello, l’anovación, l’agricultura ecolóxica y el mediu ambiente son el pegollu sobre’l qu’asienta’l programa eleutoral llocal de la coalición nacionalista. “Queremos ufiertar el futuru polígonu de La Cobertoria a aquelles empreses que quieran trabayar nel campu de les enerxíes alternatives, na xestión de residuos al traviés del reciclaxe y na anovación”, anunció’l candidatu. La creación de plantas de ‘pellets’ pa les calderes de biomasa, plantas d’ellaboración de compost, de material orgánicu a gran escala para facer y comercializar esi compost, asina como plantes de recicláu d’envases, aparatos llétricos, neumáticos o materiales de construcción, son dalgunes de les propuestes de Bloque-UNA.
 
D’igual forma, la coalición también quier puxar “pol aprovechamientu de los recursos naturales por parte de los vecinos de los núcleos rurales mediante la creación de cooperatives qu’eviten el despoblamientu de los pueblos, y pola instalación nel conceyu de más módulos formativos agroalimentarios y relacionaos cel mediu ambiente”, añade Pérez Acebal. Por último, el candidatu a l’alcaldía de Ḷḷena apuesta por una meyor política de xestión de residuos, con recoyida ‘puerta y puerta’ y el fomentu del reciclaxe “como materia prima pal funcionamientu d’estas empreses”.