Bloque-UNA critica la “hipocresía política” de PP y PSOE al respeuto de los fondos mineros

La supresión de les partíes previstes de fondos mineros destinaes a infraestructures destapa, n’opinión de Bloque-UNA, la “hipocresía política” de PP y PSOE. Pa la coalición supón “una agresión nueva a los intereses d’Asturies”.

“La situación actual, onde too paez indicar que la crisis na que tamos somorguiaos va pa llargu, fainos  poner en dulda la continuación nel futuru inmediatu de los fondos mineros. Si yá a resultes de la nefasta xestión fecha dende'l primer plan de la minería y de los retayos entamaos pol gobiernu socialista nos dos últimos años podemos tar falando d'un déficit na execución de proyectos d'ente 800 y 900 millones d'euros, la midida adoptada pol gobiernu del PP, condicionando les inversiones de los fondos a les necesidaes de retayar la deuda pública –al igual que fixera'l PSOE–, les posibilidaes de que n'exercicios próximos sigan produciéndose incumplimientos sistemáticos por parte del gobiernu español resulten más que probables”, señala’l Bloque por Asturies-Unidá Nacionalista Asturiana (UNA) nun comunicáu robláu por Manuel Benayas y Yolanda Huergo. Los voceros de les dos formaciones nacionalistes critiquen la “hipocresía política” de los dos partíos mayoritarios tres comprobar como’l PP, qu’esixía “estos años el cumplimientu íntegru de les inversiones apautaes”, xustifica agora los recortes fechos pol Gobiernu estatal, mentes que’l PSOE, “principal responsable del enorme déficit d'execución de los proyectos, lo mesmo que de los retayos producíos estos dos años últimos, pretenda agora alzase en paladín y defensor de les inversiones comprometíes, llegando inclusive a llamar a la movilización contra los gobiernos asturianu y español nun rumbu de cinismu políticu difícilmente superable”.

D’igual forma, la coalición nacionalista llamenta la postura de los alcaldes del PSOE nes cuenques “anteponiendo los sos intereses partidistes a los xenerales de los sos conceyos”, y de los sindicatos mayoritarios, UXT y CC OO, porque, “magar ye ciertu que vienen denunciando costantemente estos incumplimientos, nun ye menos ciertu qu'hasta agora nun lo fixeren cola fuerza que paecen querer demostrar, de tal manera que la so  actitú de simple denuncia nestos años pasaos condiciona la so credibilidá pa convocar movilizaciones nesti momentu”. Por último, Bloque-UNA llama a la movilización de la sociedá asturiana pa “pronunciase masivamente contra los retayos de les cantidaes apautaes” y pa “esixir al gobiernu español el cumplimientu de les sos obligaciones coles cuenques mineres y con Asturies”.