Bloque-UNA critica “los ataques sistemáticos” de Carmen Moriyón “a tol texíu asociativu xixonés”
|
25 Payares, 2011 por Pablo R. Guardado
- Inicie sesión o rexístrese pa espublizar comentarios
El desallugu del puestín del movimientu 15-M na Plaza Mayor llevó a Bloque-UNA a criticar “los ataques sistemáticos” de l’alcaldesa “a tol texíu asociativu xixonés". Pide-y esplicaciones pola espulsión de los indignaos d'esti espaciu públicu.
Daniel Fernández, voceru de Bloque por Asturies-Unidá Nacionalista Asturiana (UNA) en Xixón, refuga “de la forma más contundente'l desallugu del puntu d'información del 15-M de la plaza del Conceyu” que tuvo llugar esta selmana y la sustracción de “pertenencies personales y coleutives del movimientu, siendo especialmente esmolecedor el robu de datos y información personal, al más puru estilu de la Gestapo”. La formación nacionalista entiende que los indignaos namái faen usu d’un espaciu públicu y destaca’l so carauter pacíficu.
Por esi motivu, solicita a Carmen Moriyón que “esplique les causes del desallugu” d'un puntu d'información d'un movimientu “qu'actúa dende unos principios éticos totalmente irreprochables, independientemente de que se comparta con ellos les sos reivindicaciones o non”. Según la coalición, lo que fixo’l Conceyu ye “atacar al usu llibre de los espacios públicu pa usos sociales, lo que va contra los principios democráticos más esenciales”. “La democracia nun pue reducise a votar cada cuatro años”, añade Fernández.
Los nacionalistes nun creen que sía casual que “esti desallugu se produza xusto depués de les eleiciones xenerales” y enmarquen esta actuación “na política d'ataques sistemáticos de Carmen Moriyón a tol texíu asociativu xixonés”, porque, según el so voceru na ciudá, ye “la única forma de que Foro pueda exercer la so aición de gobiernu en Xixón con tranquilidá, yá que la oposición municipal ta tan desllexitimada y desnortiada que poco dañu pue face-y”. Ello lleva a FAC, n’opinión de la coalición, a “callar toles protestes de movimientos sociales, vecinales, xuveniles y llaborales, porque saben que d'ellos va venir la verdadera oposición a la so xestión”.
Efrén d'Andrés
Lo + visto de la selmana
Comentarios
Y venga repetir: "...los nacionalistes...", "...los nacionalistes". ¿Bloque-UNA nacionalistes? ¿Nun tamos falando más bien de los arrabaldes y periferies d´IU, los "indignaos" y una versión bable-gaita del perroflautismu?
Á, Pelayu Coloráu, qué ye ho? los carnés de "nacionalista" los das tu?... pues yo repartu los de "como esto ye de baldre y nun digo'l mio nome, echo pela boca lo que me vien en gana porque nun tengo güevos dicilo a la cara, con nome y apellíos". Pases cuando quieras a por él.