Bloque-UNA critica’l “poco respetu que’l Gobiernu tien pa col seutor musical asturianu”

La coalición Bloque por Asturies-UNA cree necesario camudar dafechu la política musical asturiana. Los nacionalistes tamién muestren el so esmolecimientu sobre la xestión de los derechos d’autor nel Estáu.
 
Rafael Palacios y Yolanda Huergo, cabezaleros de la candidatura de la coalición Bloque por Asturies-Unidá Nacionalista Asturiana pa les eleiciones de mayu, criticaron “la falta d'iniciatives por parte de la Conseyería de Cultura pa fomentar, sofitar y promocionar la música de Asturies”, tres aconceyase con delles entidaes musicales. La formación nacionalista considera que’l Gobiernu del país tien poco respetu “pa col seutor musical asturianu” y punxo d’exemplos “el rechazu a que'l Festival Intercélticu de Lorient tea dedicáu a Asturies nel 2011, la marcha del Derrame Rock” o “la perda d’oportunidaes” que supón nun enfocar les actividaes del 8 de setiembre a unos actos “que reflexen la calidá y bayura de la escena musical asturiana”.
 
Por ello, ente les sos propuestes pal programa eleutoral que van presentar pa los comicios del 22 de mayu, el Bloque-UNA va incluyir la necesidá de “afitar una cuota mínima d'emisión na RTPA, dientro d'unos horarios dignos, na que suene y se promocione a los grupos d’Asturies”; la creación d’un sellu de calidá de música asturiana “pa promocionar y proyeutar a los artistes d’Asturies acullá de les llendes” del país; la puesta en marcha d’espacios baxo xestión pública que programen actuaciones musicales y cuenten con llocales d’ensayu a precios asequibles; y garrar p’Asturies el modelu européu de “ayudes públiques regulaes pa garantizar la ufierta d'actuaciones en vivo per tola xeografía asturiana; nunes condiciones dignes pa músicos, públicu y propietarios de les sales”.
 
D’igual forma, el Bloque-UNA mostró el so esmolecimientu pola xestión de los derechos d’autor nel Estáu. Los nacionalistes califiquen “d'abusivu y monopolísticu el llabor de la Sociedá Xeneral d'Autores y Editores (SGAE)” y va proponer, nos espacios onde consigan representación institucional, “una declaración pública contra la práutica acutal de la SGAE y en defensa de que los derechos d'autor los xestione una entidá pública, de forma tresparente, con tarifes democrátiques, y que los sos beneficios económicos se destinen de forma pública a fomentar la cultura”.