Bloque-UNA algamó’l 0,86 por cientu de los votos de la emigración

Los resultaos de los partíos asturianistes ente los emigrantes tampoco foron bonos. Bloque por Asturies-UNA recibió 28 votos, un 0,86 por cientu del total, mentes qu’Unión URAS-PAS y Conceyu Abiertu tuvieron 8 apoyos cada ún (0,25 por cientu).
 
3.265 emigrantes exercieron el votu, una cifra menor que n’otres ocasiones por mor de la llei eleutoral nueva qu’obliga a los emigrante a censase pa poder dir a votar. Na circunscripción central, Rafael Palacios sumó 18 apoyos, mentes que Xuan Xosé Sánchez Vicente tuvo 6 y Mariu Arbesú, 2. Pel occidente, Bloque por Asturies-UNA llegó a los 7; Conceyu Abiertu, a los 4; y Unión URAS-PAS, a los 2. Por último, na oriental, la coalición nacionalista algamó 3 votos; Conceyu Abiertu, 2; y Unión URAS-PAS, nengún. La suma d’estos resultaos colos del votu presencial dexen a Bloque-UNA con 6.188 votos; a Unión URAS-PAS, con 2.956; y a Conceyu Abiertu, con 1.537.
 
Otra manera, la fuercia más votada nel esterior foi'l PSOE con 1684 apoyos, un contundente 51,58 por cientu del total. El PP recibió 677 votos (20,74 por cientu); FAC, 273 (8,36 por cientu); y IX-LV, 250 (7,66 por cientu).