Bloque por Asturies y Los Verdes siguen entovía negociando posibles alcuerdos con IX

Entamáu yá l'añu 2007, les estremaes fuerces polítiques asturianes siguen entovía en negociaciones con vistes a alcuerdos electorales pa les autonómiques del próximu 27 de mayu. Les negociaciones ente Izquierda Xunida con Bloque por Asturies y col partíu Los Verdes tán nun momentu de parón, anque esta situación nun va durar muncho, según comentaron a Asturies.com representantes d'estes dos formaciones.

Pela parte del Bloque por Asturies, formación que ye parte del actual pautu que gobierna n'Asturies, tá yá peslláu l'alcuerdu con IX pa repitir llista nes autonómiques, según adelantare Asturies.com, col sétimu puestu na llista a la Xunta Xeneral y el compromisu de que dos persones designaes pol BA entraríen a trabayar nel Grupu Parllamentariu, pero ello nun quier dicir que l'alcuerdu sía total. Según esplicó Rafael Palacios, hai otros dos pegollos de la negociación qu'entovía tán pendientes de solución. El primeru afecta a les candidatures nos conceyos. Anque yá hai alcuerdu pa delles, casu de L.lena, la formación asturianista quier "facese más visible" nel alcuerdu pa les municipales, sobremanera nes candidatures de los valles del Nalon y Caudal y en Xixon y Gozón, onde'l Bloque entiende que trabayó como pa ello a lo llargo d'estos años. Palacios esplicó tamién que ta contactándose dende'l BA a persones independientes que representen nes llistes el "compromisu de sectores concretos que queremos que tean representaos".

El segundu pegollu entovía por iguar ye'l que correspuende a la posicion ente la reforma de l'Estatutu y la posible reedición del pautu de gobiernu, pautu que se ve como mui posible en cuantes que les encuestes coles que trabaya la formación dan-y a IX-BA cinco posibles escaños, pronosticando amás un empate técnicu ente PP y PSOE. Anque Palacios reconoz que "tamos mui cercanos nestes cuestiones" alvierte que "nun vamos firmar nengún alcuerdu nin participar en nengun gobiernu que nun reconoza los derechos que nos correspouenden como pueblu, sían economicos, culturales o de tou tipu, ente ellos la oficialida del asturianu". Palacios definió el qu'Asturies "nun se vea como una autonomía con derechos de segunda clase" na reforma del estatutu como "una posicion de partida del Bloque, non como dalgo negociable".

Anque les negociaciones tean paralizaes, dalgo que Palacios xustificó en parte pola crisis que sufre IX, el representante del BA cree qu'hai "bona dimposición" pa llegar a un alcuerdu y nun-y abulta que'l pautu de gobiernu existente vaya francer d'equí a les elecciones, dalgo que, según esplicó Palacios, veríase como "oportunismu politicu baratu". Anque acusó a la FSA-PSOE de tener una postura de "sectarismu" en cuestiones como l'asturianu, el director de Cooperación sólo vería esta posibilidá en casu de "incumplimientu gravisimu del alcuerdu de gobiernu" y entiende que nun ye momentu pa ello en cuantes que la so prioridá pasa per "desarrollar nel tiempu que queda esti ultimu presupuestu de la llexislatura".

Pela parte de Los Verdes, el so representante Joaquín Arce esplicó a Asturies.com que la so formación ta en negociaciones con IX pa llegar a un alcuerdu electoral, anque nel so casu la negociación ta menos avanzada que nel casu del BA. Con haber una ufierta por parte d'IX enriba de la mesa, Los Verdes tán pendientes d'una asamblea a celebrar esta mesma selmana na que tienen que decidir si se sigue alantre col diálogu con IX o non. Casu de siguise alantre, los Verdes, que nun quixeron afondar nel conteníu de la propuesta que-yos fizo la coalición que representa Jesús Iglesias, cuenten con rematar tolos términos del alcuerdu nesti mesmu mes de xineru. Tocántenes al diálogu que teníen abiertu Los Verdes coles formaciones Izquierda Asturiana (IAS) y Andecha Astur (AA), Arce esplicó que los nacionalistes dieron por "terminaes" les conversaciones en conociendo de les negociaciones de Los Verdes con IX. Con too y con ello, el representante de la formación ecoloxista declaró que munchos militantes del so partíu tampoco descarten l'alcuerdu con estes formaciones.