Bloque por Asturies-UNA va celebrar el Día d’Asturies en La Pola Ḷḷena y Conceyu Abiertu, n’Uviéu

Bloque por Asturies-UNA y Conceyu Abiertu tán trabayando nos sos actos de celebración del Día de la Nación Asturiana, que van tener llugar en La Pola L.lena y Uviéu, de manera respeutiva. Unión URAS-PAS nun va facer actu oficial.
 
Per segundu añu consecutivu, y dando continuidá al proyeutu conxuntu de les dos formaciones, Bloque por Asturies y Unidá Nacionalista Asturiana (UNA) tornen a celebrar xuntos el 8 de setiembre nuna xornada na que conviden a participar a toles persones que quieran contribuyir a la construcción d’un espaciu nuevu na izquierda nacionalista. El llugar escoyíu pa la celebración ye Ḷḷena, onde la coalición tien representación municipal.
 
L’actividá va principiar pela mañana con una rueda de prensa na que los cabezaleros de los dos partíos van facer un análisis de los 100 díes primeros de Gobiernu de Francisco Álvarez-Cascos. Pa les 13 hores, ta previsto l’aniciu d’un actu políticu na plaza Alfonso X ‘El Sabio’ de La Pola Ḷḷena na que van intervenir los voceros nacionales y llocales de Bloque-UNA, pa pesllar la xornada a les 15 hores con una xinta popular.
 
Pela so parte, Conceyu Abiertu va celebrar una manifestación n’Uviéu baxo’l lema ‘Más Asturies, menos España’, según anunció ayeri la formación. Ésta va salir a les 13 hores de la Estación del Norte y va percorrer les cais de la ciudá p’acabar énte la Presidencia del Gobiernu. Amás, la candidatura d’unidá popular tien previsto entamar delles actividaes asociaes al Día de la Nación Asturiana que va confirmar nos díes próximos. Nun comunicáu na so web, Conceyu Abiertu fai “un llamáu a la sociedá asturiana en xeneral, y a les organizaciones sociales y polítiques comprometies con Asturies, a movilizase esi día y a sofitar esta convocatoria”.
 
La formación qu’esti añu nun tien previsto facer nengún actu oficial ye Unión URAS-PAS. Según confirmó Xuan Xosé Sánchez Vicente, la intención del so partíu ye la d’entamar una “actu patrióticu informal” ente la militancia. Otra manera, Amieva va acoyer esti añu les celebraciones institucionales que, tres el cambiu de Gobiernu, van ser más reducíes y austeres que nes ediciones anteriores. Con un programa tovía por confirmar, l’área recreativa de Trambesagües va ser el llugar nel que van desendolcase toles actividaes, que van centrase namái nel 8 de setiembre.