Bloque por Asturies-UNA de Siero pide al Conceyu subvenciones pa promover sestaferies na zona rural

Bloque por Asturies-UNA de Siero, siguiendo’l modelu puestu en marcha apocayá en Ribeseya, pide al Conceyu que dea subvenciones pa promover sestaferies. La coalición cree que sería una bona forma de potenciar la zona rural.
 
"El dineru que'l Conceyu Siero destina a llimpieza de caminos, poda de sebes y eliminación de basureros pirata podía dase a asociaciones o coleutivos de la zona qu'entamaren sestaferies pa esi trabayu; les perres diben asina revertir nel propiu mediu rural y, amás, el Conceyu diba aforrar l'IVA", añaden los nacionalistes, que tamién proponen que "les brigaes les integre xente de la zona en situación de paru, colo que se-yos diba proporcionar un ingresu estra".
 
N’opinión de Bloque por Asturies-Unidá Nacionalista Asturiana (UNA) de Siero, cumpliríase tamién una función pedagóxica "sobre la importancia de respetar el mediu natural, yá qu'implicar a los vecinos y les vecines nesta xera diba valer tamién pa que nos pueblos fuera más difícil que se reproduxeran basureros o s'emporcaren sitios". Amás, la coalición propón que'l Conceyu "redacte y ponga en práutica un protocolu d'actuación no referente a podes y llimpieza nel mediu rural. Hasta la fecha les máquines que rocen pasen ensin miramientos pa con elementos vexetales qu'habría que respetar. La poda dexa a la vista cantidá de basura, pero nun hai una brigada que pase llimpiándolo. Obres feches pol propiu Conceyu dexen escombriu, cintes y porquería que nun se recueye".