Bloque por Asturies-UNA critica l'ausencia d'empreses nel Centru Teunolóxicu de L’Entregu

El Centru Teunolóxicu de L’Entregu entama la so actividá cola sola presencia d’una empresa –treslladada dende Llangréu– nes sos instalaciones. Bloque-UNA critica la ocupación nula del centru pese a les promeses feches por Graciano Torre.
 
“Nel 2008, el señor conseyeru facía público qu'esistía demanda abonda como pa enllenar les instalaciones dende'l primer día. Una de dos, o tamos ante un fracasu absolutu nes xestiones pa facer realidá esa ocupación plena anunciada nel so momentu o, en realidá, eses empreses interesaes nunca esistieron, constituyendo un engañu nuevu per parte del conseyeru anterior que vien a sumase a los yá fechos a los trabayadores de Venturo XXI y Alas Aluminium”, señalen dende’l Bloque por Asturies-Unidá Nacionalista Asturiana (UNA) de Samartín del Rei Aurelio. La realidá ye, que tres l’apertura del Centru Teunolóxicu, namái una empresa ocupa les instalaciones. Ésta trátase de B2B, firma con sede na Ciudá Teunolóxica de Valnaló que se tresllada hasta L’Entregu, dalgo que nun presta nel Conceyu de Llangréu y que la coalición nacionalista califica de “desllocalización interna”.
 
“Entendemos que nun ye'l meyor de los caminos pa consiguir la so plena ocupación, tanto no que se refier a captaciones d'empreses nueves pa la ecuenca como pa llegar a los 450 puestos de trabayu que se diben a crear nesti centru teunolóxicu”, apunten dende Bloque-UNA, que muestren la so “perplexidá” poles declaraciones feches pol Institutu de Desarrollu Económicu del Principáu d’Asturies (Idepa), dependiente d’Industria, de que tán negociando tovía con empreses pa que s’instalen nel Centru Teunolóxicu de L’Entregu. Esta instalación nueva tuvo una inversión de 5.813.370 euros.