Blanca Fernández gana'l I Premiu Radagast de novela p'autores mozos

Esti concursu ta especializáu nel xéneru de fantasía, ciencia ficción y terror.

La yerbata Blanca Fernández, con 'Trovadoresca', llevó'l I Premiu Radagast de Novela Fantástica, Ciencia Ficción y Terror pa xente mozo. Ye una historia de fantasía urbana que s'asitia nun tiempu presente pero que cuenta con elementos máxicos y sobrenaturales.

El xuráu, formáu pol escritor Héctor Pérez Iglesias, la traductora Aymara González Montoto y Adrián Carbayales, collaborador del dixital cultural Refuelgu, decidióse por esta novela curtia por unanimidá "pola so gran calidá, que rescampló perriba les otres obres presentaes". Ente los motivos "indiscutibles" pa da-y el premiu apunten al "bon ritmu narrativu, áxil y bien lleváu demientres tola hestoria; amás de la frescura de los diálogos y el guapu manexu del rexistru oral, que-y da una dimensión entá más arriquecedora".

Tamién destaquen "la frescura del so plantegamientu xuvenil, llixeru, graciosu, encantador y creyible, con un desendolcu consistente y bien filao d’elementos naturales y realistes con otros de calter sobrenatural que nun ruempe en dengún momentu'l pautu de verosimilitú y que xenera una atmósfera qu’enganchó a tolos miembros del xuráu". Otru aspeutu a rescamplar ye'l "claror de la voz narrativa, bien definida, con puxu y qu’acompaña perfechamente unos personaxes femeninos d’una fuercia que va dar de qué falar na lliteratura del xéneru pero, n’especial, na lliteratura asturiana".

Fernández, que tien tien asoleyada una bona cantidá de rellatos, ta a piques d'espublizar otra novela d'esta temática, 'L’home les caparines', a la que va sumase 'Trovadoresca' nel futuru, yá qu'ún de les recompenses d'esti concursu ye la so edición, amás d'un diploma y 300 euros polos derechos de la historia. La editorial Radagast cuenta con entamar una segunda edición d'esti premiu pa menores de 35 años nel 2022.