Bimenes, reserva natural de la Oficialidá del asturianu

Martimporra, capital del Conceyu de Bimenes, celebra güei el día grande de la Fiesta de la Oficialidá. El programa d'actividaes, qu'abren los Pauliteiros de Miranda do Douro, tien nel pregón del caderalgu de scioloxía Francisco Llera Ramo, autor de les dos encuestes sociollingüístiques d'Asturies y Académicu de la Llingua, ún de los puntos fuertes d'una xornada que tien na parte musical el ganchu de la presencia de los grupos Xera y Los Berrones, amás de la celebración a lo llargo de la tarde de bien d'actividaes deportives ente les que llama l'atención la exhibición d'entibadores mineros.

La Fiesta de la Oficialidá llega asina al so cume tres de'una selmana estrada d'actos culturales y debates sobre'l momentu pel que pasa l'idioma asturianu. D'otra manera, el concursu de cuentos que se convoca cola fiesta foi anguaño pa Xosé Ramón Martín Ardines, siendo finalistes los relatos de Xosé Nel Riesgo y Carlos Montero.

La Fiesta de la Oficialidá de Bimenes remembra un añu tres d'otru la fecha del 4 de xunetu del añu 1997, cuando'l Conceyu Yerbatu foi'l primeru n'aprebar la oficialidá del assturianu dientro de les sos llendes alministratives.