Bimenes acueye un taller d'asturianu pa tolos niveles basáu nel coaprendizaxe

La matrícula ta abierta hasta'l 13 d'ochobre.

El Serviciu de Normalización Llingüística de la 'Comarca de la Sidra' entama en Bimenes un taller d'asturianu enfocáu dende una perspeutiva práutica y de coaprendizaxe que yá punxo n'otros conceyos con bona esperiencia. El cursu ta empobináu a toles persones que quieran iniciase y tamién perfeicionar el so nivel d'asturianu, tando abiertu tanto a xente que lo desconoza dafechu como a los que, conociéndolo de casa, quieran ameyoralo y deprender a falar y escribir curioso, dando una atención especial a tola producción cultural actual que se val d'esta llingua.

Gracies a la collaboración del Conceyu de Bimenes, va desendolcase dende'l 13 d'ochobre na Casa la Cultura de Santuyano tolos martes, de 18 a 20 hores. El final del cursu ta previstu pal 22 d'avientu, anque nel casu de que l'alumnáu tuviere interesáu podría allargase nel 2021.

La inscripción ye de baldre y pue formalizase, hasta'l primer día de clase, al traviés del teléfonu del Conceyu n'horariu de mañana (985.70.00.04) o bien del corréu electrónicu del SNL (normastur@lacomarcadelasidra.com).