Bienestar Social va mirar los ingresos de la unidá familiar a la hora de dar ayudes al alquiler de vivienda

La conseyera de Bienestar Social y Igualdá, Paloma Menéndez Prado, confirmó esti llunes que’l Gobiernu va mirar los ingresos de la unidá familiar a la hora de dar ayudes al aquiler. Hasta agora teníense en cuenta los del solicitante.
 
Esta midida va tar vixente dende la convocatoria próxima, según esplicó Menéndez Prado na comisión de Bienestar Social y Igualdá de la Xunta Xeneral, onde compareció a pidimientu del grupu parllamentariu popular. Na so intervención dixo que la intención del so departamentu ye intensificar la promoción pública y privada de la vivienda protexida n'alquiler y que'l Gobiernu asturianu va ellaborar un Plan de vivienda 2013-2016, dao que l'antiguu acabó nel 2008 y dende entós foi prorrogándose. La intención del Gobiernu ye facelu "en coordinación" col plan que va ellaborar el Gobiernu estatal.
 
No que se refier al 'stock' de vivienda qu'esiste n'Asturies, la conseyera comentó que tán estudiando que los constructores puedan tresformar la vivienda llibre en protexida. "Ye una posibilidá que va quedar a disposición del promotor, porque creemos que l'alquiler ye una midida pa reducir esi stock", señaló. Al respeutu, esplicó que'l Gobiernu nun descarta mercar viviendes a constructores pa destinales al alquiler: "Sería dalgo necesario, pero nun se fadría a cualquier preciu".
 
Menéndez Prado insistió tamién na importancia de les polítiques de rehabilitación, con nueves llinies d'ayudes, frente al "consumu de suelu", y garantizó que va caltener la renta básica d'emancipación, dada la situación que traviesen munchos mozos y moces. No que se refier a Viviendes del Principáu d'Asturies (Vipasa), dixo que tien una deuda de 40 millones d'euros y que nesti momentu "nun ta previsto que cambie de función", anque recordó que ta sometiéndose a una auditoría. Por último, la conseyera fixo referencia a la partida establecida nos presupuestos d’esti añu que presuponíen unos ingresos más de cien millones d'euros pola venta de viviendes propiedá del Gobiernu. "Como muncho van ingresase unos dos millones", recordó. "Foi un brinde al sol del Gobiernu anterior", añadió pa depúes afirmar que l'Executivu de FAC "nun va echar a naide de la so casa pa intentar vender eses viviendes".
 
Nun convenció al PP
 
Les pallabres de la conseyera nun convencieron al PP, como amosó la diputada Ana Barrientos al señalar que la política de vivienda sigue siendo “una fueya en blanco” nel Gobiernu. "Ye lo mesmo qu'había, y lo nuevo nun s'esplica", reprochó la popular a Menéndez Prado. Pela so parte, el socialista Álvaro Álvarez argumentó que la conseyera nun realizó "propuestes concretes" pa reactivar el sector de la construcción de vivienda. "Creo que ye peligroso que s'abandone la xeneración de suelu, porque ensin promover suelu nun podrá caltenese'l ritmu de vivienda protexida n'Asturies", manifestó.
 
Noemí Martín, conseyera anterior del ramu, criticó l'ausencia de novedaes y dixo que teme qu'haya "retrocesos" al respeuto de lo que yá esiste.