Bien de novedaes pa la tercera edición del Crossroad Festival

La organización del Crossroad Festival, el certame xixonés de blues y rock de raigón que llega anguaño a la so tercera edición, ta acabante de dar a conocer un primer adelantu del cartel col que se va presentar esti añu un festival que nació gracies a una modesta iniciativa particular y qu'en namás trés años foi a facese un nome dientro y fuera d'Asturies.

Tres el trunfu organizativu y de públicu del Crossroad del 2004, la organización entama una 3ª edición estrada de novedaes. En primer llugar el certame triplica'l presupuestu en previsión d'un festival de cuatro díes en cuenta de dos. L'allugamientu del festival ye la primer novedá que van notar los aficionaos, abandonándose una plaza de toros que los organizadores camienten que va queda-yos pequeña pa llevar los conciertos hasta los praos de la Universidá Llaboral, frente por frente col Xardín Botánicu Atlánticu, onde van ponese dos escenarios en cuenta d'ún y una carpa con actividaes paraleles, ente les que la organización adelanta la collaboración que va facese cola ONG Accem d'ayuda a los refuxaos.

El certame, que va desarrollase del 21 al 24 de xunetu, ta en condiciones d'adelantar yá los nomes de los artistes que van actuar, ente los que rescampla la presencia de Little Richard. Consideráu por munchos como'l rei del rock - un títulu que munchos dicen que-y quitó Elvis porque Richard nun yera blancu- Richard ye'l compositor de munchos títulos de la época dorada del rock, casu de Long Tall Sally, Tutti Frutti, Good Golly Miss Molly o Lucille. Xunta Richard, que va tocar per primer vegada n'España, el certame va contar tamién cola participación d'otru pesu pesáu na persona de Willy DeVille, al que'l gran públicu conoz de xuro pol tema "demasiado corazón". Nacíu pa la música col espollete del punk nos años 70 col grupu Mink DeVille, Willy lleva décades amestando'l rock con soníos franceses y d'otres procedencies, siendo un artista que concasa mui bien col espíritu del Crossroad.

Ente'l restu del cartel llama l'atención la presencia del contrabaxu de los Stray Cats, Lee Rocker. Ello ye que dempués de la prestosa esperiencia del añu pasáu, nel que los Stray Cats foron les estrelles absolutes del festival, Lee pidió-y espresamente a la organización volver a tocar nel Crossroad, onde va presentar Blue Suede Nights, el so tercer trabayu en solitario. El canadiense Colin James, ún de de los principales renovadores del blues, ye otra presencia destacada nun cartel que pel momentu da anuncia tamién de la presencia de The Stepbrothers, el bluesman neoyorquín Lucky Peterson, el grupu de garaxe y rockabilly The A-Bones, la banda de doo-wop The Redondos, un proyectu del líder de Royal Crown Revue, Eddie Nichols, el grupu de rock finlandés Eero Raittinen & the Noisy Kinda Men y los arxentinos Superatones.