Biagini dio-y la remontada al Sporting

Cola obligación de ganar dempués de la derrota nel últimu minutu en Balaidos la otra selmana, un Sporting col equipu al completu saltaba al campu del Molinón énte una afición que nun dexó d'acudir anque lloviere y anque'l partíu lu pasaren per Canal+. Pero los de Marcelino demostraron que los partíos de mañana suelen atragantáse-yos y nun foron a pasar el primer tiempu, que foi de lo más aburrío y ensin nada curioso que ver per parte de los dos equipos. Cuando paecía que'l partíu diba dexar pasar el primer tiempu ensin goles, el Sporting cayó nun error defensivu grave al perder el balón nel mediu del campu. Ensin mayor oposición y viendo a Roberto mui adelantáu, el ferrolanu Carlos picó la pelota lo xusto pa que-y pàsare per enriba al arrebatedor del equipu local. El primer tiempu acababa darréu del gol y lo peor yera que'l Sporting entamaba'l segundu tiempu desnortiáu y superáu por un Ferrol que marcaba'l segundu tantu nuna volea espectacular del pichichi de segunda, Bermejo, ello cuando taba bien claro que l'equipu gallegu nun tenía nin un mínimu de calidá pa merecer aquel resultáu.

Desesperada énte lo que taba viendo, la grada repartía entós l'enfadu ente los xugadores del equipu local pola so inoperancia y ente Cobas, futbolista del Ferrol con pasáu Sportinguista que taba siendo ún de los pegollos del xuegu del equipu gallegu. Col Molinón desesperáu, Marcelino sacó a Calandria, qu'acusaba'l dañu de la gripe, pa da-y entrada a Leo Biagini. L'arxentinu tenía de ser en teoría una de les referencies del Sporting n'ataque esta liga, pero l'ex d'equipos como'l Mallorca nun llegare a Xixón nel meyor momentu de forma, pasando meses enteros ensin xugar por lesión.

El cambéu llegó nel meyor momentu pa un Sporting que taba empezando a allegase hasta l'area rival, convertiéndose Leo nel xugador revolvín que precisaba l'equipu. El mesmu Biagini atacó nel área ferrolana mareando'l balón ente los defenses visitantes pa apurri-ylu a Samuel, que supo cambialu de pierna pa batir a Bello cola zurda. En menos de cinco minutos, otru ataque del Sporting con centru de Juan dende la izquierda punxo'l balón a l'alcance de Biagini, qu'emburriaba'l pelotu al fondu de la rede a l'altura del segundu palu. Yera l'empate a dos y la reconciliación col públicu, que bramaba por un terceru. Ismael fízolu picándo-y la pelota per enriba a Bello nun mano a mano ente los dos, pero l'árbitrio anuló-y el gol al delanteru navarru por un orsay qu'inventó'l linier y que naide más nun vio.

El Sporting, que taba entrando a degüellu nel área del Ferrol, nun diba dase por aquello, y gracies a otra xugada de Biagini diba llegar el penalti del 3-2 definitivu cuando ún de los xugadores gallegos tocaba'l balón cola mano dientro del área. El capitán Samuel fízose cargu de la responsabilidá y convertió la pena másima, dexando al Sporting con trés puntos más na tabla y cargáu de moral pa enfrentase la selmana qu'entra al Cádiz, líder de la categoría.