Bernardo Atxaga fala de l'actualidá vasca n'Uviéu

El Colectivu "Conceyu de Xóvenes Historiadores" organiza esti llunes 8 de xineru una conferencia del escritor vascu Bernardo Atxaga. Ello va ser a les 20:00 hores nel Club de Prensa "La Nueva España" d'Uviéu, asitiáu na Cai Calvo Sotelo de la capital asturiana. La conferencia del escritor vascu, que va tener como tema Euskadi, garra especial protagonismu dempués del atentau del pasau día 30 nel que se dió por desaniciada la tregua permanente d'ETA, y ello ye qu'Atxaga, amás d'una de les plumes más importantes de la lliteratura vasca, ye tamién ún de los intelectuales vascos más comprometíos cola resolución del llamau conflictu vascu, participando cola so opinión n'iniciatives como'l documental "La Pelota Vasca" de Julio Medem.

Bernardo Atxaga, seudónimu de José Irazu Garmendia, ñació n'Aesteasu, Guipúzcoa, el 27 de xunetu de 1951. Ye llicenciáu en Ciencies Económiques pola Universidá de Bilbao y en Filosofía y Lletres pola Universidá de Barcelona.

Escribió les sos primeres obres n'euskera col seudónimu de Bernardo Atxaga. Ye autor de poemes, cuentos y noveles, asina como d'una veintena de llibros pa guah.es.

La edición de "Obaboak" foi la so consagración tanto nel ámbitu vascu como nel mundu hispánicu. La torna a más de 20 idiomes d'esta obra, pola que foi Premiu Nacional de Lliteratura, reportó al autor un merecíu respetu, revalidau fasta la fecha en cada una de les sos obres.

Obabakoak llevóse al cine gracies a Montxo Armendáriz na película "Obaba". Esta mesma novela pue lleese tornada al asturianu por Lena Rodríguez Coalla
pa Editora del Norte.