Bermeyu, reelixíu como secretariu xeneral d'Andecha Astur

El Conceyu Xeneral d’Andecha Astur celebráu’l sábadu en Xixón decidió por unanimidá la continuidá d’Arturu Xosé Bermeyu como secretariu xeneral. Tamién escoyó los miembros que componen la Xunta Executiva y la Xeneral.

Tres la votación, Bermeyu espresó'l so enfotu y compromisu pa con Andecha Astur, "una organización que si enantes yera importante, agora ye imprescindible", afirmó. Tamién asumió comu propies les iniciatives que se plantegaren nel Conceyu Xeneral y anunció novedaes a curtiu plazu que tendrán por oxetu afondar na capacidá d'organización y respuesta social del nacionalismu d'izquierda asturianu. La intención de la formación ye siguir puxando pola xunidá d'aicion y por Conceyu Abiertu comu alternativa xunitaria dende la base.

Amás de la escoyeta de secretariu xeneral, el Conceyu Xeneral d’Andecha tamién decidió la composición de la Xunta Executiva, formada por ocho persones, y de la Xunta Xeneral, por quince. Amás, alcordó la convocatoria, en fecha por determinar, d'un Conceyu Nacional ordinariu p'afitar estatutos y marcar una llinia política que s'afaye a la realidá de l'Asturies d'anguaño.