Berlusconi niégase a dimitir y reta a una moción de censura

El primer ministru italianu, Silvio Berlusconi, espresó la so negativa a dimitir y indicó que'l presidente de la Cámara de los Diputaos, Gianfranco Fini, tendrá que presentar una moción de censura na Cámara Baxa si quier la so dimisión.

Según informa 'Il Messaggero', Berlusconi faló per teléfonu con dellos dirixentes y ministros del so partíu, el Pueblu de la Llibertá (PDL), dende'l conceyu del G-20 celebráu en Seúl, y comunicó-yos que se niega a dimitir y que Fini tendrá que presentar el so pidimientu "a la lluz del sol y delantre de tolos italianos".
  
Pela so parte, el coordinador del PDL, Ignazio La Russa, señaló que'l so partíu "ta uníu" y que los dirixentes del PDL "consideren inaceptable que la llexislatura puea siguir con un primer ministru distintu y un gobiernu distintu".

Una crisis pilotada  
Gianfranco Fini, líder del partíu Futuru y Llibertá (FLI) señaló qu'espera una respuesta formal de Silvio Berlusconi sobre'l so pidimientu de dimisión cuando vuelva del conceyu del G-20, tres la xunta celebrada col ministru de Reformes y líder de la Lliga Norte, Umberto Bossi, pa esclarar el futuru de la mayoría gubernamental nel Parlamentu.
  
Según la prensa italiana, Fini esplicó que Bossi quería saber hasta qué puntu llegaba'l so determín a esixir la dimisión del primer ministru y sorrayó que Berlusconi "nun quier dimitir".
  
Per otra parte, Fini repitió que "va retirar la delegación del FLI del Gobiernu" si Berlusconi nun dimite. En rompiendo con Berlusconi esti branu, Fini creó un nuevu partíu, el FLI, col apoyu de dellos senadores y diputaos y algunos de los sos miembros siguen ocupando cargos nel Executivu.
  
Sicasí, el presidente de la Cámara señaló tamién que los miembros del FLI van esperar a que Berlusconi vuelva del G-20 pa llograr una respuesta del 'premier'.
  
Pela so parte, Bossi señaló que ye meyor "una crisis pilotada" qu'una crisis "na escuridá". Amás, el líder de la Lliga Norte caltuvo que Fini ta d'acuerdu nesta posible "crisis pilotada", cola posibilidá "d'una reelección" de Berlusconi como primer ministru.
  
L'alcuentru ente Fini y Bossi duró una hora y de siguío reuniéronse colos miembros del so partíu pa informar de la xunta. Según el vicepresidente del FLI, Giorgio Conte, la xunta "nun resolvió nada".
  
Per otra parte, el líder de la oposición y secretariu del Partíu Democráticu (PD), Pierluigi Bersani, declaró que l'alcuentru ente Bossi y Fini cambia un poco la situación, puesto que nesti momentu lo qu'hai ye una crisis proclamada". Nesti sen, reclamó un gobiernu de transición" y qu'haya "discontinuidá" nel Executivu.