Bélxica y Europa busquen al terrorista fuxíu

Los otros trés terroristes matáronse non atentaos. El númberu de muertos asítiase en 31 y el de firíos llega a 270. La comunidá asturiana en Bruxeles amuesa'l so apoyu a les víctimes, al igual que los eurodiputaos asturianos presentes na capital belga.

Les informaciones que se conocen de momento sobre les trés esplosiones ayeri en Bruxeles, reivindicaes pol Estáu Islámicu, apunten a l'aición de cuatro terroristes, de los que trés s'inmolaron nos atentaos asocedíos na terminal de salides del aeropuertu Brussels-National y na estación de metru Maelbeek. El fuxíu, qu'actuó na instalación aeroportuaria, ta ensin identificar y ye la persona más buscada anguaño en Bélxica. Dalgunos medios llocales afirmen que ye Najim Laachraoiu, implicáu supuestamente na matanza de payares en París, anque nun ta confirmáu oficialmente.

El terrorista islamista ye'l que lleva sombreru na imaxe difundida poles fuercies de seguridá belgues onde apaecen los trés terroristes emburriando dos carros con maletes momentos enantes del atentáu.

Reaiciones de los asturianos en Bruxeles

La capital belga ye sede d'un amplia colonia d'emigrantes asturianos, ente los que nun hebo que llamentar nenguna víctima. El Centru Asturianu de Bruxeles amosó ayeri al traviés de les redes sociales el so "apoyu a les victimes de los atentaos d'esta mañana en Bruxeles y presenta'l so pésame a toles families afeutaes".

Los eurodiputaos asturianos tamién vivieron los momentos de terror na capital belga. Asina, Tania González Peñas escribió dende la sede del Parllamentu européu "Enorme tristeza poles esplosiones en Bruxeles. Tol apoyu a les víctimes y familiares". Mentes, la so compañera de Podemos, Estefanía Torres, espresó que "tol mundo ta llamándonos pa ver cómo tamos per equí. Énte'l terrible dolor que causa la violencia, siempre se texen los llazos de la solidaridá cada vez con más fuercia. Que nun perdamos nunca eso. Que nun mos quiten la nuesa capacidá de ser más humanos en momentos como éstos. A pesar del terror, la rabia y l'odiu que quieren imponer, lo que nunca serán quien a matar ye la nuesa capacidá d'estremecenos y d'ayudanos entovía más. El terrorismu nun va quitanos nunca la voluntá de llibertá y democracia".

Ángela Vallina, d'Izquierda Xunida nun espublizó mensaxe nengún, mentes que'l socialista Jonás Fernández señaló al momentu tar "impresionáu, afeutáu y cabreáu con estos supuestos atentados nel corazón d'Europa. Europa vencerá. ¡Europa ye más qu'un Gobiernu puntual! Europa ye la democracia, la llibertá, la igualdá y la solidaridá. Europa taba estos díis coles moces y les families de les erasmus muertes en Tarragona. ¡¡¡Y güei ta en Bruxeles!!! Dende España... ¡Puxa Europa y la nuesa bandera!".