Belenos estudia la simboloxía del Asturcón

El poni astur y la so simboloxía y mitu va ser el tema del V Seminariu d'Estudios Asturianos de la Fundación Belenos.

Otra vuelta más la Puela Allande va acoyer esti seminariu qu'entama'l Conceyu d'Estudios Etnográficos Belenos. Ellí, dende les 10 de la mañana d'esti sábadu día 20, va haber un riestra de charres y alderiques al rodiu de la simboloxía y mitu del asturcón. Asina, el sábadu pela mañana dende les 10:30 hores, la Dr n'arqueoloxía María del Mar Gabaldón va falar de "Aspeutos simbólicos y relixosos del caballu na edá de fierro", darréu va ser el turnu de la tamién Dr n'arqueoloxía Irene Seco Serra, que va charrar sobre "El caballu asturcón nes fontes clásiques".

Pela tarde Alberto Álvarez Peña va tocar el tema de los "Resclavos míticos del caballu na tradición asturiana". Pa pesllar la xornada del sábadu, l'autor del llibru "Les races autóctones del Principáu d´Asturies" l'asturianu Antón Álvarez Sevilla, va falar de "Los Ponis celtes". El domingu pela mañana va haber un Conceyu Abiertu sobre'l tema "L'asturcón ya los ponis celtes, perspeutives de futuru", nesi conceyu van participar Luis Felipe Capellín Corrada, presidente d'ACPRA (Asociación de criadores de Ponis de Raza Asturcón), Herminio Pose Prieto albeitre de la Xunta de Galicia y encargáu del llibru xenealóxicu del Cabalo Galego Montés, y el yá mencionáu Antón Álvarez Sevilla.