Begoña López González sustitúi a Pilar Varela al frente del SEPEPA

Dende'l 2018 ocupaba l'Observatoriu Asturianu de Servicios Sociales, dependiente de Derechos Sociales y Bienestar.

La Conseyería de Ciencia, Empreses, Formación y Emplegu prepara una reforma del Serviciu Públicu d'Emplegu del Principáu d'Asturies (SEPEPA) que va entamar por una renovación de los sos órganos de gobiernu. El primer movimientu ye la sustitución de Pilar Varela por Begoña López González na direición del organismu, cambiu que va ser efeutivu cuando dea'l preste'l Conseyu de Gobiernu.

Llicenciada y doctora en Socioloxía, máster en Direición Pública y Lideralgu Institucional y especialista n'Investigación Social Aplicada y Análisis de Datos, foi responsable de l'área d'Análisis Sociolóxicu del Conseyu Económicu y Social del Principáu d'Asturies y profesora asociada nel Departamentu de Socioloxía de la Universidáu d'Uviéu, ente otros cargos, y nel 2018 incorporóse al so puestu actual.

El conseyeru Borja Sánchez García esplicó que'l relevu faise nun contestu de cambiu y reorganización cola llegada de competencies nueves al so departamentu, cambios colos que se pretende reforciar la coordinación ente la formación y les polítiques d'emplegu, apuntando que la esperiencia de López González n'ámbitos sociales será d'utilidá na renovación del SEPEPA. D'igual forma valoró'l llabor fechu por Varela al frente del SEPEPA dende'l 2019, sobre manera nel impulsu de convocatories y aiciones nueves pal emplegu.