Bayura de candidatos a la “buyada purpurina”

El tradicional premiu qu'entrega peles navidaes la Coordinadora Ecoloxista a la persona o entidá más contaminante del añu tien bien de candidatos, ente ellos Hidrocantábrico o les operadores de telefonía móvil.

El premiu negativu, que foi l'añu 2003 pal Director de Deportes Daniel Gutiérrez Granda, tien esti añu una bona riestra de candidatos. La llista entama pol secretariu del Soma-UGT, José Ángel Fernández Villa, "pol so sofitu a proyectos y obres de gran impactu ambiental y ensin utilidá social y por oponese al protocolu de Kyoto". En rellación tamién al protocolu de Kyoto apaez na llista de nominaos Hidrocantábrico, "pola so falta d'inversiones en depurar los gases de les sos térmiques y pola falta d'ética ambiental que tien al facer campañes "verdes""

Les trés grandes operadores de telefonía móvil son candidates al premiu "por engañar a los vecinos y compralos ensin esplica-yos el riesgu qu'impliquen les antenes de telefonía móvil qu'amás instalen ensin cumplir cola llei".

Otra gran empresa, Du Pont, ye candidata al premiu por estrenar esti añu lo que la empresa llama una planta de "Protección de Cultivos" y que pa los ecoloxistes ye cenciellamente "de pesticides" mientres que la multinacional Union Carbide postula al premiu nos venti años de la catástrofe de Bophal

A nivel d'instituciones, el Tribunal Constitucional ye candidatu pola sentencia que dexaba los Parques Nacionales en manes esclusivamente de les autonomíes, y a la Viceconseyera de Mediu Ambiente Belén Fernández pola falta de política ambiental qu'entiende la Coordinadora que fai'l Gobiernu asturianu

La llista incluye al Director del Zoolóxicu de Cangues d'Onís, al que s'acusa de "caciplar y comerciar" con especies protexíes. El premiu va entregase, como ye vezu, coincidiendo col día de los inocentes, el 28 de payares.