El voceru de la izquierda abertzale Txelui Moreno manifestó que'l Gobiernu, "en privao", reconoz "el gran caláu y la importancia" del comunicáu d'ETA, mientres que, en público, "intenta tapecer la dimensión" de la declaración.

Amás, cree que van tar nes elecciones porque nin l'Executivu "pue negar" que dieron "munchos pasos en positivo" y qu'hubo "munchos cambios".
  
Nuna comparecencia ante los medios de comunicación celebrada en Bilbao, na que tamién tuvieron presentes Marian Beitialarrangoitia, Tasio Erkizia, Niko Moreno y Aitor Bezares, ente otros, Moreno realizó una valoración "más sopesada" sobre'l comunicáu d'ETA nel que declaraba un altu'l fueu permanente, xeneral y verificable, n'analizando les reacciones que provocó.
  
El representante de la izquierda abertzale calcó en que "tamos ante una decisión histórica d'ETA, que respuende satisfactoriamente a les demandes plantegaes pola comunidá internacional y los firmantes de Gernika p'avanzar hacia un escenariu de non violencia y normalización política con garantíes".
  
En repitiendo que se trata d'una decisión unillateral y non condicionada", destacó que "s'abre una nueva fase política y qu'esixe responsabilidá y xestión política per parte de toos". Coles mesmes, manifestó que "el compromisu d'ETA, dende la unillateralidá y verificabilidá", lleva a "un procesu de solución definitivu, que conlleve'l fin de la confrontación armada" y da-y "a la decisión d'altu'l fueu una dimensión que ruempe la estratexa de manipulación sobre tregües táctiques, tregües-trampa o condicionamientos".
  
Nesti sen, denunció "les llectures interesaes" realizaes dende distintos ámbitos políticos "en relación a la billateralidá, presuntos tutelaxes" o les afirmaciones de que la banda nun decidió la so disolución. "Realizáronse cabrioles lliteraries, buscando debilitar el so conteníu y potencialidá. Naide, dende la responsabilidá y honestidá política, pue sostener estos conceptos", calcó.  
  
Al so xuiciu, trátase de "una decisión d'enorme importancia y sin precedentes" y ésta "tien que permitir construyir ente toos un escenariu de paz y soluciones democrátiques".

En publico y en privao
Pa Txelui Moreno, "nel Gobiernu cohabitaron dos sensaciones, la privada, onde s'entiende que ye una decisión de gran importancia y caláu, y la pública, que pretende siguir asitiando la pelota nel teyáu de la izquierda abertzale, buscando una amortización rápida del conteníu de la declaración".
  
"El Gobiernu y el PP tuvieron mieu de realizar una valoración oxetiva y real de la declaración d'ETA, intentando despintar a la opinión pública española la dimensión de la decisión d'ETA", sorrayó.
  
Por ello, volvió plantegar "la necesidá d'una xestión constructiva de la solución política". "La izquierda abertzale aportó y va siguir aportando, pero'l procesu democráticu obliga a toos a asitiase en clave d'aportación", precisó.
  
En sorrayando que "el compromisu de la izquierda abertzale ye irreversible y total" pa llograr "una solución del conflictu y un escenariu de paz", mostróse convencíu de que'l Gobiernu, "no privao, fai una interpretación bien distinta a la que faen públicamente porque ye'l guión que tienen que facer". "Esperemos qu'eso cambie tamién y s'intente dar pasos en positivo", señaló.

PNV
Coles mesmes, apuntó que se pudo constatar que, pa determinaos sectores", esta nueva situación tornó "nuna traxedia política", y dirixóse al PNV pa tresllada-y "la decepción" de la izquierda abertzale ante la valoración del presidente del PNV, Iñigo Urkullu.
  
Na so opinión, "nun contestu onde'l Gobiernu sigue calteniendo estratexes represives y coercitives contra la "izquierda abertzale", el PNV, "que caltién al Gobiernu socialista, nun seya más esixente y interpelativu col Gobiernu, en llugar de tar permanentemente apelando a la izquierda abertzale".
  
Nesta llinia, indicó que, "mientres unos aporten en positivo, otros ponen torgues y boicotien". "Ante esta situación, el PNV nun pue caltener una equidistancia nesti momentu históricu, dando cobertoria a los qu'alimenten l'inmovilismu", manifestó.
  
Amás, sorrayó que "les dos almes" de la formación jeltzale ye algo "histórico" y sorrayó que "les declaraciones d'Urkullu nun tienen nada que ver coles d'Egibar". "L'asuntu ye si eso se pacta", indicó, pa considerar que "la estratexa que sigue'l PNV ye la d'Urkullu", de "nun dar pasos en positivo y poner toles torgues del mundu".
  
Tamién se refirió a la comunidá internacional, pa calificar de "gran altor y perspectiva" la so valoración, y afirmó que la izquierda abertzale ta "a la so disposición" pa "siguir trabayando na construcción d'un nuevu futuru". Coles mesmes, consideró "positiva la reflexón conxunta" realizada polos firmantes del Acuerdu de Gernika, y reestableció'l so "compromisu por desarrollar tolos sos conteníos".

Elecciones
Txelui Moreno señaló que la pretensión de la izquierda abertzale ye presentase a elecciones "con una marca llegal, tener un partíu llegalizáu, pa poder facer política como los demás n'igualdá de condiciones". "Y eso ye lo que vamos faer", aseguró, pa precisar que va ser a últimos de xineru cuando rexistren la so nueva marca.
  
Sicasí, precisó que "ye un mandatu" de les sos bases, reflexáu nel documentu 'Zutik Euskal Herria', "que nun tien nada que ver col comunicáu" d'ETA.
  
Amás, precisó que "la irreversibilidá" del procesu nun depende de que la izquierda abertzale puea tar o non a lo último nes elecciones. "La nuesa estratexa va muncho más allá de les elecciones, nun ta pensada en función d'unes elecciones que mos toquen agora, pero tán ehí y sería deseable que tea, porque eso implicaría que les coses van per onde tienen que dir", aseguró.
  
Moreno señaló que, cola so declaración del llunes, ETA "dio'l so pasu en positivo" y emplazó "a la otra parte a empezar a dar pasos". Nesta llinia, recordó que "una de les vulneraciones de derechos" que se tienen que superar ye la de la illegalización. 
  
El representante de la izquierda abertzale destacó que "nun conciben" que se-yos quite d'acudir a les elecciones, y sorrayó que "nin siquier el mesmu Gobiernu pue negar que nesti momentu foi de munchos cambios, de munchos pasos en positivo" pa llograr "la resolución del conflictu". "La izquierda abertzale, non yá va tar presente nes elecciones, sinón que va tener unos resultaos bien bonos", señaló.
  
Coles mesmes, precisó que "lo que nun ye de recibo ye que'l Fiscal Xeneral del Estáu, que tien que velar pola llegalidá, diga que 'yá nun val cumplila", y apostó porque "dimita" porque "lo que dixo ye la mayor burricada que pue dicir" el máximu representante de la Fiscalía.

ETA
Sobre la posibilidá de qu'ETA puea faer públicos nuevos comunicaos, Moreno puntualizó que supón que la organización "va siguir faciendo los sos analises y les sos coses". "Nós nun tenemos nenguna bola pa certificar si eso va ser asina o non", apuntó.
  
Coles mesmes, recordó que, n'otros casos, como nel del IRA, la organización irlandesa "tardó muncho más tiempu en certificar" el so abandonu. "¿Equí qué puede pasar? Nun lo sabemos, pero seguru qu'ETA va siguir faciendo les sos valoraciones polítiques, pero, sacar más comunicaos, nun lo sé", dixo.
  
Preguntáu por si existe una negociación ente ETA y el Gobiernu, como afirmó l'eurodiputáu del PP, Jaime Mayor Oreya, retrucó que nun tienen "datos".