Barbón suspende la so axenda pública al contaxase de COVID-19 per segunda vez

Va siguir cola so actividá llaboral dende Presidencia al pasar la enfermedá de forma leve.

"Al tar mal esta mañana y dao que tenía axenda pública, fixi un test d'antíxenos de coronavirus que dio positivo", anunció'l presidente Adrián Barbón pasáu'l meudía. Por esti motivu decidió suspender la so axenda pública, qu'incluyía pa güei un alcuentru cola alcaldesa de Llangréu, Carmen Arbesú, y, yá de tarde, otru col primer edil de Llanes, Enrique Riestra.

Esti contaxu, el segundu depués de garrar la enfermedá n'avientu, llega depués de toles actividaes nos que participo estos díes con motivu de los XLII Premios Princesa de Asturias, nes que caltuvo contautu con munches persones de diferentes procedencies. Naquella ocasión, el socialista tuvo que ser ingresáu por precaución nel Hospital Universitariu Central d'Asturies (HUCA), pero nésta ta pasando la COVID-19 de manera leve, lo que facilitará que pueda siguir colos sos llabores dende Presidencia.

Na imaxe, Adrián Barbón da unes pallabres al públicu qu'asistió ayeri al pabellón d'El Quirinal al 'Torneo Internacional de Judo Villa de Avilés' pa ver les finales sub-15 en compañía de l'alcaldesa Mariví Monteserín. Semeya obra d'Armando Álvarez.