Barbón releva a Suárez al frente d’Educación, a la que va sustituyir Espina

Carmen Suárez dexa la Conseyería d’Educación. Nel ecuador de la llexislatura Adrián Barbón decidió facer un únicu cambiu nel Gobiernu, relevando a la xixonesa pa poner al mandu a Lydia Espina, hasta agora direutora xeneral de Planificación y Infraestructures Educatives.

Ye la segunda modificación que fai’l presidente nel so Executivu, depués de que l’añu pasáu reforzara’l papel del vicepresidente Juan Cofiño, hasta esi momentu conseyeru d’Infraestructures, Mediu Ambiente y Cambiu Climáticu, pa centrase na reforma de l’Alministración que’l llavianés punxo como ún de los sos oxetivos cimeros pa esta llexislatura. Asina’l so departamentu pasó a nomase Conseyería d’Alministración Autonómica, Mediu Ambiente y Cambiu Climáticu, encargándose de ‘Infraestructures’ Alejandro Calvo, cabezaleru de la Conseyería de Mediu Rural qu’añadió l’apellíu de ‘Cohesión Territorial’.

Agora releva a Suárez, una de les conseyeres más cuestionaes, que se comprometiera col llavianés pa los 2 primeros años de mandatu, con bones pallabres hacia ella, rescamplando’l so “trabayu, dedicación y compromisu” nun periodu “especialmente duru y complexu, marcáu pola pandemia, nel que se cometieron aciertos y erros, pero nel que se demostró qu'Asturies cunta con un sistema educativu públicu robustu y capaz d'encarar circunstancies estraordinariamente adverses”. Toma’l relevu Espina (Villaviciosa, 1974), llicenciada en Filoloxía Inglesa pola Universidad de Salamanca y funcionaria de carrera del cuerpu de maestros dende 2016.

Conceyala d’Educación, Cultura y Deporte de Villaviciosa y direutora del xixonés Colexu Públicu Montevil, incorporóse en febreru a la Conseyería d’Educación como direutora xeneral de Planificación y Infraestructures Educatives, lo que fai que sía una bona conocedora de la situación del departamentu. L’encargu principal fechu por Barbón a la conseyera nueva, que va asumir el cargu’l xueves, ye adaptar la ufierta formativa a les necesidaes llaborales pa contribuyir al amenorgamientu del desemplegu xuvenil: “Avanzar hacia una mayor conexón ente formación y emplegu pa poder encarar los importantes retos que supón un mercáu llaboral en tresformamientu pol impautu de la revolución teunolóxica y el protagonismu de la innovación”, afirmó.

Tamién rescampló que va contar con tol so sofitu “pa facer frente a los desafíos que tenemos per delantre”, que, confirmó, Espina “va facer dende'l diálogu, l'alcuerdu y la busca de lo meyor pa los intereses d'Asturies”.

La especialidá docente

Ente los retos que va tener qu’afrontar la maliaya nestos dos años próximos ta la creación de la especialidá docente de Llingua Asturiana y Gallego-asturiano, anguaño paralizada en Madrid, onde tamién hebo cambiu na cartera d’Educación y Formación Profesional. Isabel Celáa, qu’optaba por esperar a la declaración d’oficialidá n’Uviéu, cesó nel so cargu en beneficiu de Pilar Alegría.

Na semeya, Suárez y Espina nun aconceyamientu celebráu'l mes pasáu.