Barbón recuerda la declaración de soberanía de la Xunta Xeneral

|
Mensaxes d'Adrián Barbón en Twitter 25-M

"Como presidente, nun puedo dexar de mentar esti día y conmemoralu, más nestos momentos difíciles que nos toca afrontar", afirmó esti 25-M na rede social Twitter.

El 25 de mayu, una fecha escaecida dende siempre poles instituciones asturianes magar la so importancia histórica, foi recordáu esta mañana por Adrián Barbón. Nun mensaxe en Twitter en castellanu apuntó que "güei 25 de mayu, Asturies empieza la fase 2 de desescalada, polo que debemos doblar la prudencia y la llamada a la responsabilidá. Tamién ye'l día en que se conmemora la declaración que la Xunta Xeneral del Principáu fixo esi día, nel 1808, declarando la guerra a Napoleón".

Darréu sigue rellatando que "los oríxenes de la nuesa bandera tán mui venceyaos con esta fecha histórica, el 25 de mayu del 1808 y la declaración de la guerra a Napoleón pola Xunta Xeneral. Foi entós cuando basándose nun informe de Xovellanos diseñaron l'estandarte del exércitu asturianu". Pa finar, señala que "Asturies tien una historia que hemos conocer, reivindicar y de la que sentinos arguyosos. Como presidente, nun puedo dexar de mentar esti día y conmemoralu, más nestos momentos difíciles que nos toca afrontar. El 25 de mayu, siempre será una fecha pa recordar".

Contador Estadistiques