Barbón reconoz como “fracasu” la reforma del Estatutu, cuestión que “nun significa un arrenunciu”

La Xunta Xeneral vive esti miércoles el so Plenu últimu de la decimoprimer llexislatura. Na parte del Plenu d'entrugues al presidente, Adrián Barbón reconoció “abiertamente” la reforma del Estatutu d'Autonomía “como un fracasu” xunto cola Llei LGTBI, pero señaló que “son cuestiones que nun signifiquen un arrenunciu, sinón que van ser compromisos pa sacar alantre na llexislatura próxima”.

Xornada de despidida nel Parllamentu asturianu. Un momentu qu’aprovecharon delles formaciones pa solicitar al líder del Gobiernu un análisis del mandatu, provocando dalgún alderique más xubíu de tonu de lo normal, como’l que protagonizó cola popular Beatriz Polledo, a la que-y dixo que “nun entiendo la so posición na reforma del Estatutu; nun entiendo que tengan esa manía persecutoria a les llingües d’Asturies, a la llingua asturiana y a la fala eonaviega. A ver cómo van facer campaña nel occidente”.

Nun tonu más moderáu, Podemos preguntó a Barbón al traviés de Rafael Palacios por “qué iniciatives comprometíes a lo llargo de la llexislatura pol so Gobiernu nun consiguieron sacar alantre”. “Digo-y dalguna que reconozo abiertamente: la reforma del Estatutu, creo que ye un fracasu qu’asumimos, que ye fracasu non sólo del Gobiernu pero principalmente tamién del Gobiernu, y la Llei LGTBI, de los derechos del coleutivu LGTBI. Pero quiero dexar una cosa clara: son cuestiones que nun signifiquen un arrenunciu, sinón que van ser compromisos pa sacalos alantre na llexislatura próxima”.

Na semeya, Barbón respuende de pie a les entrugues, con Palacios nel so escañu de malva.