Barbón recibió a D'Andrés y a los representantes de la Sociedad Bíblica

|
Adrián Barbón y representantes de la Sociedad Bíblica

La conseyera Berta Piñán representó al Gobiernu na presentación de la Biblia en llingua asturiana nel RIDEA.

El presidente Adrián Barbón recibió ayeri nel despachu Pedro de Silva de Presidencia a José Luis Andavert, Manuel Álvarez y Luis Fajardo, los representantes de la Sociedad Bíblica desplazaos a Asturies, y a Ramón d'Andrés, revisor llingüísticu y lliterariu de la traducción. L'alcuentru allargóse per más d'una hora, rescamplando Andaver la amabilidá y cordialidá del llavianés.

Piñán, qu'asistió xunto con Antón García, direutor xeneral de Política Llingüística, ocupó un espaciu na mesa presidencial con Ramón Rodríguez Álvarez, direutor del Real Instituto de Estudios Asturianos (RIDEA), y Fajardo, y calificó la xornada d'un día "mui especial". Darréu felicitó "a la Sociedad Bíblica y a toes aquelles persones, que son munches, que trabayaron d'una manera tan profesional y con tanto procuru nada menos qu'a lo llargo de trés décades".

Llueu de rescamplar el llabor desinteresáu de tolos participantes nel proyeutu y de conocer con detalle'l rigor puestu na traducción, tres les esposiciones feches nel actu, dixo tar "más segura de qu'esta obra tresciende'l propiu llabor editorial hasta convertise nun fechu cultural singular". Un trabayu, poro, "de calidá, profesionalidá lliteraria y sensibilidá relixosa", siguió, pa depués emponderar la importancia de la traducción nel procesu de normalización llingüística y rellatar el proyeutu de La Casina de la Traducción que la Conseyería de Cultura, Política Llingüística y Turismu va entamar xunto col Conceyu de Valdés na casa natal del Padre Galo.

Les ausencies

La gran ausencia nel actu correspondió al Arzobispáu d'Uviéu, que nun unvió representación magar que Jesús Sanz Montes firmara la presentación de la Biblia, entitulada 'Como aquella mañana en Xerusalén', xunto con Xosé Corsino Fernández, de l'Asociación de Ministros de Cultu Evanxélicu del Principáu d'Asturies, y Andavert. Mentes, la Fundación Municipal de Cultura, xestionada por Ciudadanos, y la Universidá d'Uviéu escusaron la so falta por motivos d'axenda.

Na semeya, Barbón, nel centru, xunto con Álvarez y D'Andrés a la so derecha y Fajardo y Andavert a la so izquierda.

 

Contador Estadistiques