Barbón reafirma a González Riaño la so intención d’encarar la reforma del Estatutu esta llexislatura pa incluyir la oficialidá del asturianu

|
Xosé Antón González Riaño y Adrián Barbón

Xosé Antón González Riaño, presidente de l’Academia de la Llingua Asturiana (ALLA), tien “plena seguranza”, tres aconceyar con Adrián Barbón, de que nel 2021 va entamase’l procesu de reforma del Estatutu d’Autonomía nel que s’incluyiría la oficialidá. El presidente del país reafirmó que nesta llexislatura va abordase l’asuntu.

“L’Academia de la Llingua Asturiana entiende que na Xunta Xeneral hai güei esi númberu de 27 diputaos y, que darréu d’ello, pue entamase esti procesu, yá que nesta llexislatura les fuerces parllamentaries favoratibles a la oficialidá son ampliamente mayoritaries”, esplica la institución nuna nota. Na mesma confírmase que “hebo un alcuerdu plenu ente les dos partes nel sentíu de garantizar que nesta llexislatura va algamase la necesaria reforma estatutaria empobinada a la inclusión nel Estatutu d’Autonomía de la cooficialidá de les llingües propies d’Asturies”, una posición que’l socialista yá treslladara a la Xunta Xeneral n'ochobre nel alderique d’orientación política xeneral.

Con FSA, Xuníes Podemos y Asturies pela Izquierda (Izquierda Xunida-IAS) a favor, namái faltaría un votu p’algamar la reconocencia de los derechos de los falantes d’asturianu y gallego-asturiano, cola mira puesta en Foro, en concreto nel diputáu Adrián Pumares, partíu que dende’l 2015 amuesa’l so compromisu de trabayar por algamar un consensu políticu y social al rodiu del patrimoniu llingüísticu, cola idea d’apoyar la oficialidá cuando se dieran les condiciones. Asina, l’ALLA va ponese en contautu coles trés partíos na oposición pa tresmitir el resultáu del aconceyamientu con Barbón.

“Ábrese un futuru de recuperación llingüística n’Asturies que, dende llueu, pue considerase históricu y que, a lo cabero, va asegurar el futuru del asturianu como llingua de cultura nel Principáu”, aseguren dende la institución que, al traviés del so presidente, treslladó al llavianés que’l procesu de reforma del Estatutu “tien qu’entamase nel2021”, cola “plena seguranza de qu’esto va ser asina”. “Foi ésti un alcuentru mui positivu, nun clima de confianza mutua y alcuerdu”, resumió González Riaño.

Llei Celaá y usu del idioma en RTPA

Anque l’oficialidá foi’l noyu central de la xunta, celebrada esti meudía en Presidencia, tamién se trataron otros munchos asuntos, como les nueves posibilidaes que s’abren pa la enseñanza del asturianu cola Llei d’Educación (LOMLOE), conocida como Llei Celaá acabante aprobar nel Congresu; de la presencia del idioma nos medios de comunicación públicos, asina como nel ámbitu institucional; y el papel y posición alministrativa de l’ALLA. “Nesti análisis global que se fixo de la situación del asturianu, entrambes partes tuvieron d’alcuerdu dafechu y quedaron na necesidá d’afondar nesta política llingüística de dignificación y de recuperación del asturianu y del eonaviegu o fala”.

Na semeya, González Riaño y Barbón nun momentu del alcuentru d'esta mañana. Semeya obra d'Armando Álvarez.

Contador Estadistiques