Barbón propón recuperar la movilidá de Galicia a Navarra a metá de xunu

“Esmolezme muncho, y nun dexo d’encamenta-ylo al Gobiernu d’España, que pudiera venir xente d’otres comunidaes nuna fase epidemiolóxica muncho peor, con contaxos a nivel comunitariu, porque nun nos beneficia nin a nosotros nin a ellos”, afirma Adrián Barbón. El presidente del país quier ser prudente y que la movilidá s’abra a metá de xunu ente autonomíes nel mesmo estadiu.

“Por exemplu Galicia, Cantabria, inclusive País Vascu, Navarra… En toda esa zona del norte yá se podría plantegar esa movilidá a metá de xunu, que seguramente l’active’l Gobiernu”, esplicó’l presidente, que considera que “tien que se completar el plan, polo menos aquellos que vamos en primera llinia. Poro, hasta finales de xunu debería haber eses restricciones de movilidá porque val más ser prudentes, face les coses bien pa qu’en xunetu y agostu podamos movenos na ‘normalidá nueva’, que non acelerar n’escesu y haya un biltu”.

Barbón cree que “ye lo meyor pa la nuesa economía”, y hasta esi momentu d’apertura a otros territorios convida “a los asturianos y asturianes a percorrer Asturies, consumir n’Asturies, a dinamizar la nuesa economía y activala con toles midíes de seguranza”. El presidente del país y secretariu xeneral de la Federación Socialista Asturiana (FSA) fixo estes declaraciones anueche nun alcuentru virtual cola militancia moderáu por Andrés Suárez.

Na semeya, Suárez y Barbón.