Barbón, Marcos, nueve alcaldes y el rector Villaverde asistieron al actu académicu

Hebo representación de tolos grupos parllamentarios, cola esceición única de VOX.

Numberoses autoridaes acudieron al Teatru Campoamor p'asistir al XLII Día de les Lletres Asturianes. Ente elles, el presidente Adrián Barbón, que vieno andando dende Presidencia hasta la puerta del recintu uvieín, onde lu esperaba na puerta Xosé Antón González Riaño, presidente de l'Academia de la Llingua Asturiana (ALLA); Marcelino Marcos, presidente de la Xunta Xeneral; Berta Piñán, conseyera de Cultura, Política Llingüística y Turismu; y Antón García, direutor xeneral de Política Llingüística.

Barbón sentóse nun palcu xunto con Piñán pa siguir la Xunta Estraordinaria de l'Academia de la Llingua Asturiana (ALLA), onde se recibía a Xandru Martino como académicu correspondienta y a Pilar Rubiera como académica d'honor. Mui cerca, la conseyera d'Educación, Carmen Suárez Suárez, completando la representación socialista la diputada Noelia Macías.

Queipo tamién presente

El secretariu xeneral y diputáu Álvaro Queipo foi'l representante del PP, ensin presencia del alcalde Alfredo Canteli o de conceyales d'Uviéu, mentes que por Ciudadanos acudió la vocera parllamentaria Susana Fernández Álvarez y José Luis Costillas, secretariu d'Aición Institucional y edil d'Educación, Cultura, Centros Sociales, Salú Pública y Consumu. Por Foro tuvo'l secrerariu xeneral y voceru Adrián Pumares, y, magar que confirmara asistencia, finalmente nun tuvo Isidro Martínez Oblanca, diputáu nel Congresu.

Otra política con escañu na Cámara Baxa sí que se desplazó a Uviéu, Sofía Fernández Castañón, de Podemos, acompañada pol secretariu xeneral de Podemos Asturies, Daniel Ripa, y los diputaos Rafael Palacios y Nuria Rodríguez López. Y por Izquierda Xunida (IX), el coordinador xeneral, Ovidio Zapico; la vocera, Ángela Vallina; y el responsable de Política Llingüística, Víctor Suárez.

Nueve alcaldes acudieron tamién a la invitación de l'ALLA: Cecilia Pérez, d'El Franco; Aitor García Corte, de Bimenes; Sandra Cuesta, de Colunga; José Víctor Rodríguez, de Cangas del Narcea; Amelia Fernández, de Carreño; Yasmina Triguero, de Castrillón; César Álvarez, da Veiga; Gemma Álvarez, d'Ibias; y María del Carmen Arbesú, de Llangréu. Por parte de la Universidá d'Uviéu, tamién con una amplia presentación, asistió'l rector actual, Ignacio Villaverde, y l'anterior, Santiago García Granda.

José Manuel Zapico, secretariu xeneral de CC OO, y Borja Llorente, de CC OO Educación; Juan Jorge Estrada, d'USO; Cristóbal Puente, de FETE-UXT; y Xosé Lluis Colodrón, en representación de SUATEA, foron los sindicalistes presentes. Tamién asistieron María Xosé Martínez, presidenta de la Xunta pola Defensa de la Llingua Asturiana, y Iván Llera, presidente d'Iniciativa pol Asturianu, amás de delles respresentantes institucionales o personalidaes como Alfonso Palacio, María Esther García López, José María Montes, Gaspar Llamazares, María Cotiello o'l direutor del diariu 'La Nueva España', Gonzalo Martínez, ente otros.