Barbón gana les eleiciones con un aumentu de votos que nun impide la perda d’un diputáu socialista

La Federación Socialista Asturiana (FSA-PSOE) d’Adrián Barbón ganó les eleiciones n’Asturies. Col 98,19 por cientu del votu escrutáu, rexistra 2.000 votos más que nel 2019, pasando d’un 35,25 por cientu del total a un 36,52, anque pierde un diputáu nuna Xunta Xeneral que caltién una mayoría d’izquierda.

Si va 4 años los socialistes algamaron 20 escaños, nesta ocasión queden en 19. Como segunda fuercia sigue’l PP con Diego Canga, que pasa de 10 a 17 aprovechando la concentración del votu de centroderecha pola cayida de Ciudadanos, que tenía 5 y agora queda ensin representación.

VOX queda como tercera fuercia, doblando númberu de diputaos, de 2 a 4. Aumenta tamién Izquierda Xunida que nesta ocasión incorporó a Más País a la so coalición con Izquierda Asturiana, agora baxo’l nome de Convocatoria por Asturies, de 2 a 3.

Xune Elipe nun va tener asientu nel Parllamentu asturianu al sacar Podemos un únicu representante y perder 3 con respeuto al 2019, y Adrián Pumares consigue salvar la presencia de Foro, que, sicasí, pasa de 2 a 1 diputaos. SOS Asturias ye, con un 1,08 por cientu de los votos, la primer fuercia estraparllamentaria, y Andecha Astur pierde apoyos con respeuto al 2019.

La participación nestes eleiciones foi del 64,32 por cientu, superior a la del 2019 en dos puntos (62,37 por cientu). El porcentaxe de votos en blancu foi del 1,77 por cientu, un aumentu del 0,67 por cientu, y de votos nulos del 1,44 por cientu, nesti casu una medra del 0,51 por cientu.