Barbón espera que, cola oficialidá, l’asturianu tenga presencia na ceremonia de los Premios Princesa

“La ceremonia será en castellanu, pero toi seguru que sí s’utilizaría la llingua propia como se fai n’otres ceremonies, por exemplu en Girona”, aseguró’l presidente Adrián Barbón. Esti vienres entréguense los Premios Princesa de Asturias nel Campoamor, teatru frente al que ta convocada, un añu más, una protesta republicana.

El llavianés fixo estes declaraciones a TPA nuna mañana cargada d’actividaes n’Uviéu pola entrega de los XLI Premios Princesa de Asturias. Protagonista de numberoses entrevistes a medios nacionales y estatales, la oficialidá y la reforma del Estatutu foi una cuestión repetida nelles.

Na fecha pola televisión pública asturiana sobre la presencia del asturianu na ceremonia nel casu de salir alantre’l procesu, Barbón apuntó que “siempre se fixo en castellanu y entiendo que será en castellanu, pero dende llueu toi seguru que sí s’utilizaría la llingua propia como se fai n’otres ceremonies. Por exemplu en Girona, vímoslo va poco, la propia princesa d’Asturies, que tamién ye princesa de Girona, usó’l catalán con normalidá”. Yá más en concreto sobre la oficialidá, recordó que “nosotros lo que defendemos ye que se cumpla la Constitución” y añadió que “cuando fai referencia al fechu de que les demás llingües serán oficiales reconocíes nos sos estatutos dicen serán; nun dicen pueden ser, serán”.

Los premiaos

La ceremonia de los Premios Princesa va principiar a les 18.30 hores y nella los premiaos van recibir los sos reconocimientos. Los gallardonaos esti añu son Marina Abramović (Artes); Gloria Steinem (Comunicación y Humanidaes); Amartya Sen (Ciencies Sociales); Teresa Perales (Deportes); Emmanuel Carrère (Lletres); Campaign for Female Education, CAMFED (Cooperación Internacional); Katalin Karikó, Drew Weissman, Philip Felgner, Uğur Şahin, Özlem Türeci, Derrick Rossi y Sarah Gilbert (Investigación Científica y Téunica); y José Andrés y la so ONG World Central Kitchen (Concordia).

Mañana los reis d’España y la princesa van desplazase a El Puertu, población merecedora del XXXII Premiu al Pueblu Exemplar d'Asturies. Esti gallardón tien les bases nes trés llingües falaes nel país y respeta la toponimia oficial, anque esti añu al nun tar entovía aprobada la tradicional de Somiedu, al igual qu’asocedió l’añu pasáu con Pravia y Somáu, ta emplegándose’l términu ‘Santa María del Puerto’.

Concentración na Escandalera

Como vien asocediendo nos años últimos, ta convocada una concentración republicana na plaza la Escandalera por parte de dellos coleutivos como respuesta a los Premios Princesa y la presencia de la familia real n’Uviéu. El lema ye ‘No somos súbditos’ y la hora anunciada son les 17 hores.