Barbón da por imposible la especialidá docente ensin oficialidá

Remítese a los informes d'Abogacía del Estáu.

Rafael Palacios, diputáu de Podemos, treslladó al presidente Adrián Barbón na segunda sesión del Plenu de la Xunta Xeneral, celebráu esta mañana la entruga, rexistrada en castellanu, "¿comparte usté que'l profesoráu de Llinga Asturiana y de Gallego-asturiano s'alcuentra nuna situación de discriminación llaboral?". "Sí, compártolo dafechu, ye daqué obvio", respondió'l socialista, que recordó l'aconceyamientu ente la conseyera d'Educación, Lydia Espina, y la de Cultura, Política Llingüística y Turismu, Berta Piñán, cola ministra d’Educación y Formación Profesional, Pilar Alegría, y calificó la situación d'estos maestros de "inaceptable y una total inxusticia".

Nel siguiente turnu, el llavianés espuso que "les especialidaes tienen que creales ellos, non nosotros", asegurando que si tuviera "la capacitación xurídica pa crear la especialidá docente, lóxicamente fadríamoslo". Al respeuto remitióse a los informes d'Abogacía del Estáu: "lo que diz ye que pa encaxar esta cuestión dende'l puntu de vista xurídicu la solución pasa definitivamente porque haya una declaración política d'esta Cámara al rodiu la reforma del Estatutu d'Autonomía coles mayoríes esixíes", esto ye, la oficialidá, una posición ésta que nun se comparte n'ámbitos favoratibles a la reconocencia de la especialidá.

Darréu dirixóse a los partíos contrarios a la reconencia de los derechos de les llingües propies d'Asturies pa llamar a la reflexón y apuntó que "la ciudadanía, nel mediu rural sobre manera, acepta como usu normal l'asturianu, o eonaviego nel so área, y nun hai problema nengún. Tolo contrario, ye más, cuanto más s'insulta a estes persones más pierden credibilidás los que los tán insultando". Asina pidió "respetu a la cultura y la identidá como asturianos, porque'l que falta a la so llingüa, falta a la so cultura, falta a la so historia, falta a la so propia identidá".

Por último, "frente a los que viven nel complexu permantente", reivindicó'l so asturianismu, que definió como "la nuesa forma de ser españoles y poro la forma de querer y defender esta tierra".

Selmana de les Lletres Asturianes

Na so intervención, Palacios, que vistía la camiseta del corazón de demanda d'oficilidá de la Xunta pola Defensa de la Llingua Asturiana (XDLA) –recordó la manifestación del sábadu n'Uviéu–, fixo referencia a la celebración de la Selmana de les Lletres Asturianes y recordó la situación "d'anormalidá democrática" que supón dicha falta d'anormalidá, que provoca que nun se respete la toponimia o la precariedá que vive'l profesoráu, marcáu "pola interinidá, l'abusu de les medies xornaes y la imposibilidá d'alquirir la condición de funcionariáu de carrera pola falta de reconocimientu alministrativu de la so formacióna académica y la minusvalorización de la so esperiencia docente nos procesos estraordinarios d'estabilización llaboral".

Na imaxe, Barbón. Semeya obra d'Armando Álvarez.