Barbón caltién esperanza na aprobación de les cuentes, anque asegura que la FSA "ta preparada pa les eleiciones, sían cuando sían”

|
Barbón caltién esperanza na aprobación de les cuentes, anque asegura que la FSA "ta preparada pa les eleiciones, sían cuando sían”

El secretariu xeneral de la FSA, Adrián Barbón, considera que los Presupuestos Xenerales del Estáu “son positivos p’Asturies” y caltién esperances en que superen la votación del miércoles nel Congresu. De nun salir alantre, el Gobiernu convocará eleiciones, pa lo qu’asegura que "la FSA-PSOE ta preparada”.

Esta mañana, tres facer un llamamiento a l’aprobación de los PXE, alvirtió de que “si mañana se vota la so devolución supondrá castigar a los asturianos y asturianes con unes cuentes que nun nos gusten”, yá que llevaría a la prórroga de les cuentes del PP aprobaes l’añu pasáu enantes de la moción de censura a Mariano Rajoy, ensin escaecer que forzaría a Pedro Sánchez a la convocatoria anticipada d’eleiciones dada la inestabilidá a la que s’enfrentaría al Gobiernu estatal. “La FSA-PSOE ta preparada pa les eleiciones, sían cuando sían; cuando’l presidente llame a les urnes”, a entrugues de los periodistes.

Pa Barbón les cuentes “son positives p’Asturies y la so aprobación o non tien una influencia importante na sociedá asturiana”. Asina destaca que los PXE “tán lligaos a les personas, a la recuperación de derechos”, pa lo que punxo d’exemplu la xuba del 1,6 por cientu de les pensiones, l’alza del 3 por cientu de les mínimes, la eliminación del copagu farmacéuticu pa les rentes más baxes o los 900 euros del salariu mínimu, ente otros aspeutos.

No que se refier a les inversiones, fai referencia a los “295 millones de euros, un 25 por cientu más que l’añu anterior” qu’afiten los presupuestos, con destín “pa terminar la variante de Payares” y pa “carreteres y cercaníes”. “De que salgan alantre o non depende qu’apostemos por un Gobiernu que prime los derechos frente a un Gobiernu de dereches”, polo que “faigo un llamamientu públicu a que salgan aprobaos”.

Contador Estadistiques