Barbón anuncia que va proponer a los partíos negociar la oficialidá: “Nun podemos esperar más”

La selmana qu’entra los diferentes grupos parllamentarios van recibir una invitación formal pa negociar de forma conxunta una reforma del Estatutu d’Autonomía pa incluyir la oficialidá. D’esta forma’l presidente del país recueye la reclamación fecha'l vienres por Xosé Antón González Riaño y pola sociedá asturiana esti sábadu.

Nun mensaxe na rede social X, Adrián Barbón anunció en castellanu que “como presidente del Principáu d’Asturias y asumiendo la mio responsabilidá como autoridá máxima de la nuesa tierra, anúnciovos que cursaré una invitación formal, la selmana qu’entra, a los grupos parllamentarios para negociar de forma conxunta la reforma, esclusivamente, del artículu 4 del Estatutu d’Autonomía pa declarar esta llexislatura l’asturianu como llingua oficial, asina como l’eonaviego nel so ámbitu territorial. Nun podemos esperar más”.

Entiende’l socialista que “ye tiempu de dexar atrás les declaraciones y posicionamientos públicos y pasar a l’aición”. “Ye tiempu de fechos, non de pallabres. Les persones que nos proclamamos asturianistes debemos asumir esti retu y demostrar con fechos que, efeutivamente, sómoslo. Nun basta con ser o dicise asturianista de boca. Hai que demostralo con aiciones y compromisos concretos”, nuna clara referencia al presidente del PP asturianu, Álvaro Queipo.

“Convido a los grupos parllamentarios a que s’incorporen al pidimientu espresáu pol presidente de l’Academia de la Llingua Asturiana y pol clamor popular de la ciudadanía asturiana”, siguió’l socialista, que concluyó apuntando que “espero y deseo que tolos grupos parllamentarios tean al altor y demuestren el so compromisu con Asturies. Nesa xunta negociadora plantegarélo claramente: nun caben yá disculpes pa facer oficial l’asturianu y l’eonaviego. Ye la hora”.

Na semeya, Barbón ayeri nun palcu del Campoamor na xunta estraordinaria de l'Academia de la Llingua Asturiana pol XLV Día de les Lletres Asturianes xunto con Juan Cofiño, presidente de la Xunta Xeneral, y les conseyeres Ana Vanessa Gutiérrez y Lydia Espina. Detrás, n'otru palcu xunto col rector Ignacio Villaverde, el direutor xeneral Antón García.