Barbón ameyoraría’l resultáu del 2019 esti 28-M, según la encuesta preeleutoral del CIS

Adrián Barbón ganaría otra vuelta les eleiciones con una estimación de votu del 36,7 por cientu, ameyorando’l resultáu del 2019, cuando la Federación Socialista Asturiana (FSA-PSOE) rexistró un 35,56 por cientu del total. La encuesta preeleutoral del Centru d’Investigaciones Sociolóxiques (CIS) da al PP un 27,3 por cientu y mayoría a la izquierda.

Diego Canga nun consiguiría superar a Barbón según esti estudiu fechu del 10 al 26 d’abril a 494 asturianes y asturianos nel que, a diferencia del restu d’autonomíes, nun se da estimación d’escañu pol tamañu muestral y la esistencia de trés circunscripciones. El socialista sacaría 8 puntos al popular magar l’ascensu del PP, que va cuatro años tuviera un 17,71 por cientu.

Como tercer fuercia quedaría VOX, con un 9,1 por cientu (6,51 nel 2019), sustituyendo a Ciudadanos, que baxaría d’un 14,12 a un 3,7 por cientu. Mentes, Podemos rexistraría un 8 por cientu (11,16) y Convocatoria por Asturies un 6,8 por cientu (6,69 como Asturies pela Izquierda, coalición d’IX y IAS ensin Más País, que s’incorpora a la mesma nestes eleiciones).

Foro perdería votantes, al pasar d’un 6,60 por cientu a una estimación del 4,5. Otros partíos tendríen un 1,4 por cientu, un 1,7 votaría en blanco y PACMA, qu’apaez na encuesta, quedaría nun insuficiente 0,8 por cientu.