Barbón afirma que’l so Gobiernu nun arrenuncia “a midida dalguna pa que rescample la promoción del asturianu y pa qu’enanche’l so futuru”

|
Adrián Barbón caleyando

El llibru ‘Postrer adiós. Prosa, poesía, teatru’ sobre la vida y obra de María Teresa Villaverde ‘Tuxa’, conmemorativu de la XLI Selmana de les Lletres Asturianu, empecipia con unes pallabres del presidente Adrián Barbón. Nelles asegura que’l so Gobiernu nun arrenuncia a “midida dalguna pa que rescample la protección del asturianu y gallego-asturianu y pa qu’enanche’l so futuru”.

El testu, asitiáu enantes del prólogu, recuerda la decisión del Gobiernu y l’Academia de la Llingua Asturiana d’aplazar de mayu a la seronda la gran celebración de la nuesa lliteratura por cuenta la situación sanitaria pola pandemia. “Sorrayo que’l verbu escoyíu foi aplazar, non arrenunciar. El Gobiernu del Principáu tampoco arrenuncia a midida dalguna que sirva pa que rescample la protección del asturianu y el gallego-asturianu y pa qu’enanche’l so futuru. Na defensa de la nuesa cultura nun vamos conxungar nengún arrenunciu”, asegura.

Enantes, tamién amuesa “el compromisu del Gobiernu d’Asturies col so usu”. “Enxamás pudi entender por qué promover l’asturianu o’l gallego-asturianu –que ye una manera d’asegurar la so pervivencia– despierta esta rocea despreciatible, cuando non una franca perceguera”, apunta.

Tuxa tampoco nun falta ente les sos pallabres, “una persona conservadora, de fondu sentimientu relixosu”, con una comunión col asturianu que “nun respondía a un planteamientu ideolóxicu, sinón a la relación que s’anoya ente la escritora y la llingua qu’emplega, la llingua del so pueblu”. D’igual forma destaca’l rescate de la so figura, emponderando’l llabor de Lluis Portal nel llibru, depués de que “la tradición lliteraria asturiana que nos llegó paecía tar falta de muyeres escritores, ausente de les antoloxíes canóniques de la nuesa poesía antigua, pero pasu ente pasu les investigaciones modernes recuperen nomes y obres que les sitúen al par de los sos compañeros de xeneración, cuando non per delantre d l’actividá lliteraria del so tiempu”.

Semeya obra d'Armando Álvarez.

Contador Estadistiques