L'Asociación Española de Banca (AEB) y la Confederación Española de Cajas de Ahorros (CECA) decidió suspender los desallugos nos casos de “necesidá estrema”. No que se refier a los bancos, va caltenese esta midida per dos años.
L'AEB señaló que caltuvo dellos contautos con representantes del Gobiernu estatal y que'l xueves pasáu’l presidente de la patronal, Miguel Martín, treslladó al secretariu d'Estáu d'Economía y Competitividá, Fernando Jiménez Latorre, esti compromisu en nome de los bancos de l'asociación. La patronal destaca que'l conteníu d'esta midida, adoptada por “razones humanitaries” y "nel marcu de la so política de responsabilidá social", fora oxetu d'un alderique "intensu y fondu" de los bancos asociaos "con cuenta de contribuyir a solucionar la situación de desamparu de munches persones por mor de la crisis económica".
Pela so parte, les entidaes financieres asociaes a la CECA tomaron la mesma midida hasta la entrada en vixencia de la reforma normativa anunciada poles autoridaes". Nun comunicáu, señala qu'esta iniciativa súmase a los esfuerzos que, de manera independiente y dende l'entamu de la crisis, esplegaron les entidaes pa evitar los desallugos. Asina, indica que les entidaes estudiaron casu por casu pa ofrecer a los clientes hipotecarios la midida más oportuna, como refinanciaciones, periodos de falta, daciones en pagu con calter voluntariu o l'alquisición de vivienda pal so posterior alquiler al deudor, ente otres.
Mentes, el Gobiernu estatal y el PSOE avanzaron güei nes negociaciones p’adoptar soluciones a esta situación dramática que yá se llevó per delantre delles vides. El xueves ta previsto que l’Executivu apruebe un decretu coles soluciones más urxentes que pueda pautar colos socialistes.